کراچی: وزیر بلدیات سندھ سعید غنی نے کہا ہے کہ نالوں پر قائم تجاوزات کے خاتمے سے صورتحال بہتر ہوسکتی ہے، نیو کراچی میں نالے پر مصطفی کمال نے 7 ہزار دکانیں بنوائیں، ایکشن لینے گئے تو ایم کیو ایم عدالت چلی گئی۔
نجی ٹی وی سے گفتگو کرتے ہوئے سعید غنی نے کہا ہے کہ نالوں کی صفائی نہیں کی گئی یہ کہنا غلط ہے، شہر کے بڑے نالوں کی صفائی کرلی گئی تھی، نالے جتنے بھی بڑے بنالیں، گنجائش سے زیادہ پانی نہیں لے سکیں گے۔
انہوں نے کہا کہ حکومت نالے پر تجاوزات ختم کرنے جاتی ہے تو دیگر جماعتیں شور مچانا شروع کردیتی ہیں،نیو کراچی میں نالے پر مصطفی کمال نے 7ہزار دکانیں بنوائیں، ایکشن لینے گئے تو ایم کیو ایم عدالت چلی گئی۔ انہوں نے کہا کہ قدرتی آفات کی صورتحال میں جیسا کراچی کی سیاسی جماعتیں کرتی ہیں ویسا کہیں نہیں ہوتا۔
انہوں نے کہا کہ شہر کے وہ نالے جن پر تجاوزات ہیں ختم کردیئے جائیں تو صورتحال بہتر ہوسکتی ہے، نرسری کے مقام پر ہم نے کام کیا، پہلے پانی جمع ہونے کی شکایات بہت ہوتی تھیں۔
انہوں نے بتایا کہ نرسری کا مقام ایک پیالے کی طرح ہے، مختلف مقامات سے پانی آکر نرسری پر جمع ہو جاتا ہے، ہم نے نالوں سے اینٹیں، بوریاں اور بڑے بڑے پتھر نکالے ہیں، حکومت اپنی پوری کوشش کرتی ہے اور کی بھی ہے، ہم نے چار،چھ گھنٹے میں سڑکیں کھولنے کی کوشش کی ہے، شہریوں نے رضاکارانہ طور پر لوگوں کی مدد بھی کی ہے۔
