لاہور: امیر جماعت اسلامی حافظ نعیم الرحمن نے کہا ہے کہ ہم عوام کی طاقت سے چلیں گے، حکومت کو حق دینا پڑے گا، ہم معیشت بند نہیں،کھولنے والے ہیں، آگے بڑھنے کیلئے ہڑتال بھرپور طریقے سے کامیاب کرانا ہوگی۔ تفصیلات کے مطابق ایک بیان میں امیر جماعت اسلامی حافظ نعیم الرحمن نے کہا کہ ہم معیشت کا پہیہ بند کرنے والے نہیں کھولنے والے ہیں، ایک دن کی ہڑتال معیشت چلانے کیلئے ہے، کوئی حمایت نہ کرے تب بھی جماعت اسلامی ہڑتال کرے گی، یکم ستمبر سے عوام رابطہ مہم شروع کریں گے۔ انہوں نے کہا کہ یہ سارے کام پہلے بھی ہوتے رہے ہیں، آگے بڑھنا ہے تو ہڑتال کو بھرپور طریقے سے کامیاب کرانا ہوگا، سب لوگ اپنے اپنے اہداف طے کرلیں،یہ لمبی لڑائی ہے، یہ لڑائی ہم عوام کیلئے لڑرہے ہیں،سب ہمارا ساتھ دیں۔
انہوں نے کہا کہ اللہ نے چاہا تو بہت زیادہ فنڈز ملیں گے،لوگوں کو ریلیف اور حق دیا جائے۔ انہوں نے کہا کہ ہم ممبر سازی مہم بھی شروع کرنے جارہے ہیں، پوری مہم کے دوران کوئی دیہات چھوٹنا نہیں چاہئے۔
انہوں نے کہا کہ ہر گاؤں دیہات کے لوگوں کو نکالنا ہے،مارچ کرنا ہے، ایسا پروگرام تشکیل دیں گے کہ لوگ بس چلنا شروع کریں، ہمارا مارچ پورے پاکستان کے لوگوں کا مارچ ہونا چاہئے، اتنی قوت سے چلیں گے کہ مارچ کے دوران انہیں جھکنے پر مجبور کردیں گے۔انہوں نے کہا کہ آپ اجازت دیں گے تو ہم 15دن بعد واپس آئیں گے اب ایسا نہیں چلے گا، ہم عوام کی طاقت سے چلیں گے،حکومت کو حق دینا پڑے گا۔
