اسلام آباد: ایف بی آر نے ٹرانسفر پوسٹنگ کیلئے اثر رسوخ استعمال کرنیوالے افسران و اہلکاروں کیخلاف کارروائی کا فیصلہ کرلیا۔تفصیلات کے مطابق ایف بی آر کی جانب سے جاری بیان میں کہا گیا ہے کہ ایف بی آر کے بالخصوص فیلڈ اسائنمنٹ کے خواہاں افسران و اہلکاروں کی جانب سے اپنی مرضی کی ٹرانسفر و پوسٹنگ کیلئے بیرونی اثر رسوخ استعمال کرنے کا کلچر دیکھا گیا ہے جو باعث تشویش ہے۔
بیان میں کہا گیا ہے کہ بیرونی اثر رسوخ استعمال کر کے اپنی مرضی کی پوسٹنگ کے خواہاں مڈ لیول افسران ادارے کے جونیئر افسران کیلئے کیریئر کے انتخاب سے متعلق غلط ماڈل تشکیل دے رہے ہیں، ایسا رویہ ادارے کی سالمیت کو بھی نقصان پہنچا رہا ہے۔
اعلامئے میں کہاگیا ہے کہ چوائس پوسٹنگ کیلئے اثر رسوخ استعمال کرنیوالے افسران و اہلکاروں سے آہنی ہاتھوں سے نمٹنے کا فیصلہ کیا گیا ہے۔بیان میں کہا گیا ہے کہ بیرونی اثر رسوخ کا استعمال گورنمنٹ سرونٹس رولز 1964 اور سول سرونٹس رولز 2020 کی خلاف ورزی ہے،افسران اور اہلکاروں کی جانب سے ایسا ناگوار رویہ ان کی ملازمت سے برطرفی کا موجب بن سکتا ہے۔
بیان میں کہا گیا ہے کہ افسران و اہلکاروں نے ٹرانسفر یا پوسٹنگ کیلئے بیرونی اثر رسوخ استعمال کرنے کی کوشش کی تو اسے ”مس کنڈکٹ“ تصور کیا جائے گا جس پر ان کے خلاف سخت کارروائی کی جائے گی۔
