اسلام آباد میں دکان میں گیس سلنڈر کا دھماکہ ہواہے جس کے نتیجے میں 5 افراد جھلس کر زخمی ہوگئے ہیں۔
ریسکیو حکام نے بتایا ہے کہ کورال شریف آباد میں گیس سلنڈرز کی دکان میں دھماکہ کے بعد آگ لگی جس پر قابو پالیا گیا، ابتدائی اطلاعات کے مطابق دھماکے کی وجہ گیس لیکیج بتائی جارہی ہے جس کے بعد دکان میں موجود سلنڈرز نے آگ پکڑ لی تھی۔
اس حوالے سے ڈی سی اسلام آباد عرفان میمن نے بتایا کہ آتشزدگی کے واقعہ میں 5افراد جھلس کر زخمی ہوئے جنہیں ہسپتال منتقل کیا گیا، آگ لگنے کی وجوہات کا تعین کیا جا رہا ہے، بظاہر آگ سلنڈر بھرنے کے دوران لگی۔
ڈی سی اسلام آباد نے سلنڈر شاپ کو فی الفور سیل کرنے کا حکم دیتے ہوئے متعلقہ حکام کو ایسی تمام دکانوں کیخلاف کارروائی کرنے کی ہدایت کی ہے۔
