چیف آف ڈیفنس فورسز فیلڈ مارشل سید عاصم منیر نے کہا ہے کہ افغان طالبان کی پشت پناہی میں دہشتگرد ہمارے معصوم شہریوں اور بچوں کو نشانہ بنا رہے ہیں، فتنہ الخوارج کی جو تشکیلیں افغانستان سے آتی ہیں ان میں 70 فیصد افغانی شامل ہیں، افغانستان کو فتنہ الخوارج اور پاکستان میں سے کسی ایک کا انتخاب کرنا ہو گا، انہوں نے کہا کہ جن قوموں نے اپنے اسلاف کی علمی و فکری میراث اور قلم کی طاقت کو چھوڑ دیا، وہ زبوں حالی کا شکار ہو گئیں۔
پاک فوج کے شعبہ تعلقات عامہ کے مطابق چیف آف آرمی سٹاف سید عاصم منیر نے ان خیالات کا اظہار قومی علما مشائخ کانفرنس میں کیا اور ملک کو درپیش چیلنجز، دہشتگردی، قومی سلامتی کے امور، اقوامِ عالم میں پاکستان کے ابھرتے کردار، جنگی تیاریوں اور علم کی اہمیت پر مفصل گفتگو کی، کانفرنس میں ملک بھر سے تمام مکاتب فکر کے علما اور مشائخ نے بھرپور شرکت کی جہاں فیلڈ مارشل نے قرآن کریم کی آیات اور اشعار کا حوالہ دیتے ہوئے پاکستان کے بارے میں اپنا واضح نقط نظرپیش کیا۔
فیلڈ مارشل عاصم منیر نے کہا کہ اللہ تعالی نے اسلامی ممالک میں سے محافظ حرمین کا شرف پاکستان کو عطا کیا ہے، ریاست طیبہ اور ریاست پاکستان کا آپس میں ایک گہرا تعلق اور مماثلت ہے، دونوں کا قیام کلمہ طیبہ کی بنیاد پر رمضان کے بابرکت مہینے میں ہوا، دونوں ریاستوں میں مماثلت کی وجہ یہ ہے کہ رب کائنات نے انہیں خادم الحرمین بنانا تھا اور ہمیں محافظ الحرمین بنانا تھا۔
چیف آف ڈیفنس فورسز نے کہا کہ آپریشن بنیان المرصوص میں اللہ کی مدد آتے ہوئے دیکھی اور محسوس کی، کسی بھی اسلامی ریاست میں ریاست کے علاوہ کوئی جہاد کا حکم اور فتوی نہیں دے سکتا۔
