رہنماء پی ٹی آئی اسد قیصر نے کہا ہے کہ دیوار سے لگانے پر ہمارے پاس احتجاج کے علاوہ کون سا راستہ بچتا ہے؟، حکمت عملی تبدیل کرلی، مذاکرات کیلئے رابطہ کیا گیاہے، دیکھتے ہیں حکومت کتنی سنجیدگی سے ایجنڈا آگے بڑھاتی ہے۔
صوابی میں میڈیا سے گفتگو کرتے ہوئے سابق سپیکرقومی اسمبلی اسد قیصر نے کہاکہ24نومبر کے احتجاج کیلئے حکمت عملی تبدیل کر لی ہے، پشاور، مردان، چارسدہ اور نوشہرہ کے کارکنان صوابی سے اسلام آباد جائیں گے، باقی اضلاع کے کارکنان مختلف روٹس سے اسلام آباد کی طرف مارچ کریں گے۔
انہوں نے بتایا کہ علی امین گنڈاپور کے ساتھ مذاکرات کیلئے رابطہ ہوا ہے، سب سے اہم بات یہ ہے کہ بانی پی ٹی آئی نے علی امین گنڈاپور کو ہی مذاکرات کی اجازت دی ہے۔انہوں نے کہا کہ اب دیکھنا ہے کہ حکومت کتنی سنجیدگی سے ایجنڈے کو آگے بڑھاتی ہے، آپ ہمیں دیوار سے لگائیں گے تو احتجاج کے علاوہ ہمارے پاس کون سا راستہ ہے؟۔
انہوں نے کہا کہ ہم سمجھتے ہیں کہ ملک میں استحکام آنا چاہئے، اس وقت امن وامان کے چیلنجز کا سامنا ہے۔انہوں نے کہاکہ بشری بی بی غیر سیاسی ہیں، ہمیں جو حکم اور ہدایات ملتی ہیں وہ صرف اور صرف بانی پی ٹی آئی سے ملتی ہیں۔
