اسلام آباد: صدر آصف زرداری نے کہا ہے کہ عالمی قوانین،انسانی حقوق کی کھلی خلاف ورزیاں عالمی امن کیلئے خطرہ ہیں، ناانصافی اور ظلم کیخلاف آواز بلند کرنے کی ضرورت ہے، دنیا کی ترجیح تنازعات کے بجائے انسانیت کو درپیش مسائل کا حل ہونا چاہئے۔
تفصیلات کے مطابق عالمی یوم امن کے موقع پر جاری کئے گئے پیغام میں صدر آصف زرداری نے کہا کہ عالمی یوم امن پر اقوامِ عالم کے مابین امن کے اصولوں کیساتھ وابستگی کا اعادہ کرتے ہیں،آج دنیا کو مختلف علاقوں میں جغرافیائی سیاسی کشیدگی اور تنازعات کا سامنا ہے جو عالمی امن کو خطرے میں ڈال رہے ہیں۔
انہوں نے کہا کہ اسرائیل ہزاروں لوگوں کے غزہ میں قتل عام سے فلسطینیوں کی نسل کشی کر رہا ہے۔ انہوں نے کہا کہ رواں سال کے عالمی یوم امن کا موضوع ’امن کے کلچر کو فروغ دینا‘ ہے، ہم سب کو اقوامِ عالم کے مابین امن، رواداری اور بقائے باہمی کا کلچر فروغ دینا ہے۔
انہوں نے کہا کہ مودی حکومت مقبوضہ کشمیر میں سنگین انسانی حقوق کی خلاف ورزیاں کر رہی ہے، بھارتی فوج مسلمانوں اور دیگر اقلیتوں کو ظلم و ستم کا نشانہ بنا رہی ہے۔
انہوں نے کہا کہ عالمی قوانین اور انسانی حقوق کی کھلی خلاف ورزیاں عالمی امن کیلئے خطرہ ہیں، ہمیں ناانصافی اور ظلم کیخلاف آواز بلند کرنے کی ضرورت ہے، دنیا کی ترجیح تنازعات کے بجائے انسانیت کو درپیش مسائل کا حل ہونا چاہئے۔
انہوں نے کہا کہ دنیا امن کے بغیر ترقی اور خوشحالی حاصل نہیں کرسکتی، جنگیں اور تنازعات لوگوں کی مشکلات اور مصائب میں اضافہ کرتے ہیں، ہم ایسی دنیا تشکیل دے سکتے ہیں جہاں ہماری آئندہ نسلیں امن اور ہم آہنگی کیساتھ رہ سکیں۔
