واشنگٹن: دنیا بھر میں مقبول جج فرینک کیپریو طویل علالت کے بعد 88 برس کی عمر میں انتقال کر گئے۔
ایک ویڈیو بیان میں جج کیپریو کے بیٹے نے بتایا کہ ان کے والد کو دو سال قبل لبلبے کے کینسر کی تشخیص ہوئی تھی۔انہوں نے کہا کہ یہ آپ سب کی محبت اور سپورٹ تھی جس نے ان کے حوصلے بلند کیے اور ان کے دل کو تقویت دی کہ وہ اپنی بیماری سے ایک سال اور چھ ماہ زیادہ زندہ رہ سکے۔
امریکی ریاست روڈ آئی لینڈ کے شہر پراویڈنس کی میونسپل کورٹ کے سابق جج فرینک کیپریو، جو اپنی شفقت، ہمدردی اور نرم مزاج فیصلوں کے باعث دنیا بھر میں مقبول ہوئے، جج کیپریو کاٹ اِن پراویڈنس کے نام سے شو کے میزبان بھی تھے، ہلکے پھلکے انداز میں لوگوں سے بات چیت اور ان کی ذاتی زندگی سے متعلق سوالات کی وجہ سے اس شو کو دنیا بھر میں شہرت ملی، اس شو کی وائرل ویڈیوز کو سوشل میڈیا پر ایک ارب سے زائد مرتبہ دیکھا گیا۔
کیپریو اپنی عدالت کو ایک ایسی جگہ قرار دیتے تھے جہاں لوگوں اور مقدمات کو شفقت اور ہمدردی کے ساتھ سنا جاتا تھا۔ ان کے آفیشل فیس بک اکانٹ پر جاری کیے گئے پیغام میں لکھا گیا کہ جج کیپریو نے عدالت اور اس سے باہر لاکھوں افراد کی زندگیاں متاثر کیں، ان کی گرمجوشی، مزاح اور مہربانی ہر اس شخص کے دل میں نقش ہو گئی جو ان سے واقف ہوا۔
