اسلام آباد: رہنماء پی ٹی آئی شاندانہ گلزارنے کہا ہے کہ پارٹی میں ٹکٹوں کیلئے لڑنے والوں کو شرم آنی چاہئے، جس شخص کی وجہ سے لوگ ایم این اے یا سینیٹر بنے اس کے فیصلے قبول کرنا چاہئیں، اگر بانی نے کوئی فیصلہ کردیا تو اس پر دل چھوٹا کرنے کی کیا ضرورت ہے، وقت بتائے گا فیصلہ صحیح تھا یا غلط۔
نجی ٹی وی سے گفتگو کرتے ہوئے شاندانہ گلزار نے کہا کہ بانی پی ٹی آئی نے خود محمود اچکزئی کو اپوزیشن لیڈر بنایا ہے، اس سے قبل محمود اچکزئی کو اپوزیشن اتحاد کا سربراہ بھی بانی نے بنایا تھا۔
انہوں نے کہا کہ بانی پی ٹی آئی کو ایسا شخص چاہئے تھا جو سچ بول سکے اور کھل کر پاکستان کا دفاع کرسکے، اگر بانی پی ٹی آئی نے فیصلہ کردیا ہے تو اس پر اتنا چھوٹا دل کرنے کی ضرورت کیا ہے؟۔
انہوں نے کہا کہ موجودہ الیکشن کھمبا الیکشن تھا، جن لوگوں کو کوئی جانتا تک نہ تھا وہ بانی کے نام پر اسمبلی میں آئے۔انہوں نے کہا کہ پی ٹی آئی میں لوگ ٹکٹوں کیلئے لڑے مرے ہیں، انہیں شرم آنی چاہئے، جس شخص کی وجہ سے آپ ایم این اے یا سینیٹر ہیں اس کے فیصلوں کو قبول کرنا چاہئے، اس وقت عہدوں کی لڑائی کا معاملہ نہیں، بانی کا فیصلہ صحیح ہو گا یا غلط، وقت اس کا اندازہ لگائے گا۔انہوں نے کہا کہ اللہ کا شکر ہے میں سیاسی و کور کمیٹی نہیں، پارلیمانی کمیٹی میں ہوں، بانی کا جو فیصلہ آتا ہے ہم اسے قبول کرتے ہیں۔
انہوں نے کہا کہ ہمیں کا ہر فیصلہ قبول ہے ہمارا حق نہیں بنتا کہ اس کے خلاف جائیں، پوری پارلیمانی پارٹی کو بانی پی ٹی آئی کا فیصلہ قبول کرنا ہے۔
