لاہور: اداکارہ مدیحہ رضوی نے کہا ہے کہ ڈراموں میں ماں کا کردار نبھانا بالکل بھی پسند نہیں، کیونکہ ماں کا کوئی کام نہیں ہوتا، بس وہ اولاد کی وجہ سے کبھی رو رہی ہوتی ہیں، کبھی کچھ کر رہی ہوتی ہیں، آج کل مجھے زیادہ تر ماں کے کردار کی ہی پیشکش آ رہی ہے، کہا جاتا ہے کہ ہمیں جوان ماں چاہیے۔
ایک ٹی وی پرو گرام میں گفتگو کرتے ہوئے انہوں نے کہا کہ میری والدہ دیبا ایک نامور اداکارہ ہیں، اس لیے وہ میرے بچپن میں بہت زیادہ مصروف رہتی تھیں اور کبھی کبھار مجھے اپنی والدہ سے ملاقات کیے کئی کئی دن گزر جاتے تھے۔
انہوں نے کہا کہ کام کی مصروفیت کی وجہ سے والدہ کے پاس انہیں دینے کے لیے بہت کم وقت ہوتا تھا، والدہ سے دوری انہیں بہت بری لگتی تھی اور اسی وجہ سے بچپن میں شوبز بھی انہیں برا لگتا تھا، لیکن بڑے ہو کر حالات تبدیل ہوگئے۔
اداکارہ نے بتایا کہ شوبز کے حوالے سے ان کے خیالات اپنی والدہ کو تیار دیکھ کر بدلتے گئے، کیونکہ والدہ جب بھی گھر آتیں تو وہ بہت تیار ہوتی تھیں اور لڑکیوں کے اندر یہ شوق پیدائشی طور پر ہوتا ہے کہ وہ تیار ہونے کا شوق رکھتی ہیں۔
میں نے شوبز میں والدہ کی وجہ سے کبھی بھی فائدہ حاصل کرنے کی کوشش نہیں کی، بلکہ کافی سال تک بہت محنت کی اور جب کچھ پروجیکٹس کامیاب ہوگئے تو پھر لوگوں کو بتایا کہ ان کی والدہ دیبا جی ہیں۔
