کنگسٹن: پاکستان کے سابق ٹی 20 کپتان محمد رضوان کا کیریبین پریمیئر لیگ 2025 میں سینٹ کٹس اینڈ نیوس پیٹریاٹس کے ساتھ معاہدہ طے پاگیا، وہ اب سی پی ایل میں سینٹ کٹس اینڈ نیوس پیٹریاٹس کی نمائندگی کریں گے۔
رضوان کو افغان فاسٹ بالر فضل حق فاروقی کے متبادل کے طور پر ٹیم میں شامل کیا گیا ہے، جو جلد ہی افغانستان، پاکستان اور یو اے ای کے مابین ہونے والی ٹرائی سیریز کے لیے اپنی قومی ٹیم کو جوائن کریں گے ۔یہ پہلا موقع ہوگا کہ رضوان سی پی ایل میں شرکت کریں گے، جس سے لیگ میں پاکستانی کھلاڑیوں کی موجودگی میں مزید اضافہ ہو جائے گا۔
سینٹ کٹس پیٹریاٹس کی ٹیم پہلے ہی نسیم شاہ اور عباس آفریدی جیسے پاکستانی فاسٹ بالرز کی خدمات حاصل کر چکی ہے۔ اس کے علاوہ لیگ میں عماد وسیم، محمد عامر اور سلمان ارشاد بھی حصہ لے رہے ہیں۔
یہ معاہدہ اس بات کی بھی تصدیق کرتا ہے کہ رضوان پی سی بی کی پالیسی کے تحت اپنا سالانہ غیر ملکی ٹی -20 لیگز کا کوٹہ مکمل کر لیں گے، جو جولائی سے شروع ہونے والے 12 ماہ کے عرصے میں صرف دو لیگز کھیلنے کی اجازت دیتا ہے۔ اس سے قبل رضوان بگ بیش لیگ میں میلبورن رینیگیڈز کی جانب سے کھیلنے کا اعلان کر چکے ہیں۔
واضح رہے کہ سینٹ کٹس اینڈ نیوس پیٹریاٹس کی ٹیم نے رواں سیزن کا آغاز ایک فتح سے کیا، مگر اس کے بعد تین مسلسل شکستوں کا سامنا کرتے ہوئے پوائنٹس ٹیبل پر نیچے سے دوسرے نمبر پر ہے۔ ٹیم 2017 اور 2021 میں سی پی ایل کی چیمپئن بھی رہ چکی ہے۔
