کراچی: وزیر اطلاعات سندھ شرجیل میمن نے کہا ہے کہ چچا کا بجلی مہنگی، بھتیجی کا وقتی ریلیف دینا کینسر کے مریض کو نیند کی گولی دینے جیسا ہے، پنجاب میں ایک سیاسی جماعت انتشاری،دوسری کارکردگی کی بجائے باتوں پر انحصار کر رہی ہے،فیض حمید کا کورٹ مارشل ادارے کا اندرونی معاملہ، ثاقب نثار کا بھی پی ٹی آئی سے سیاسی روابط میں بڑا کردار رہا ہے۔
تفصیلات کے مطابق کراچی میں صحافیوں کے وفد سے گفتگوکرتے ہوئے وزیر اطلاعات سندھ شرجیل میمن نے کہا کہ بانی پی ٹی آئی سیاسی شعور نہیں رکھتے، وہ کب یو ٹرن لیں کچھ پتا نہیں، سیاسی استحکام کیلئے پیپلزپارٹی نے الیکشن کے فوری بعد تمام جماعتوں سے رابطوں کیلئے کمیٹی بنائی، صدر زرداری واحد شخصیت ہیں جو اسٹیٹس مین کا کردار ادا کرسکتے ہیں اور تمام سیاسی جماعتوں و اداروں کو ایک پلیٹ فارم پر متحد کرنے کی صلاحیت رکھتے ہیں۔
انہوں نے کہا کہ عمران خان نے کہا کہ پیپلزپارٹی سے بات نہیں ہو گی، وہ سیاسی جماعتوں کی بجائے اسٹیبلشمنٹ سے بات کریں گے تو کرلیں تاہم سیاسی جماعتیں سیاستدانوں سے بات کرتی ہیں۔ انہوں نے کہا کہ فیض حمید کا کورٹ مارشل ادارے کااپنا اندرونی معاملہ ہے کمنٹس نہیں کروں گا، پی ٹی آئی سے سیاسی روابط میں ثاقب نثار کا بھی بڑا کردار رہا ہے۔
انہوں نے کہا کہ پیپلزپارٹی کا موقف ہے کہ تمام اداروں کو اپنے دائرہ کار میں رہنا چاہئے۔ ایک سوال پر انہوں نے ک ہا کہ پنجاب میں ایک سیاسی جماعت انتشاری اور دوسری کارکردگی کی بجائے صرف باتوں پر انحصار کر رہی ہے جبکہ پیپلز پارٹی واحد جماعت ہے جو مستقبل کو دیکھتے ہوئے منصوبوں پر کام کررہی ہے۔
انہوں نے کہا کہ وفاق میں چچا بجلی مہنگی کرتے ہیں تو بھتیجی وقتی ریلیف کااعلان کرتی ہے،یہ ایسا ہی ہے جیسے کینسر کے مریض کو نیند کی گولی دے دی جائے۔ انہوں نے کہا کہ تھر کول پراجیکٹ سے بجلی 6 روپے 50پیسے فی یونٹ پڑتی ہے، منصوبہ سندھ سمیت پورے ملک کی تقدیر بدلے گا۔
