لاہور: وزیر اعلی پنجاب مریم نواز نے کہا ہے کہ اللہ کے فضل سے پنجاب ہر چیز میں سبقت حاصل کررہا ہے، ہمیں دیکھ کر لوگوں کی دوڑیں لگی ہوئی ہیں،گھروں کی تعمیر کیلئے بلاسود 15لاکھ روپے قرض دیں گے، آئندہ دنوں میں گزشتہ 6ماہ کی محنت رنگ لائے گی، اللہ ہمیں نیک مقصد میں کامیاب کرے،پنجاب کے عوام کیلئے مجھے خوشی کا باعث بنائے۔
تفصیلات کے مطابق وزیراعلیٰ پنجاب مریم نواز نے ’اپنی چھت اپنا گھر‘ منصوبے کی افتتاحی تقریب سے خطاب کرتے ہوئے کہا کہ آج پنجاب کے عوام کو خوشخبری دینا چاہتی ہوں، آج وہ سکیم لانچ کرنے جارہی ہوں جس کا مجھے اور نوازشریف سمیت سب کو بہت انتظار تھا۔
انہوں نے کہا کہ اپنے گھر سے بڑی کوئی نعمت نہیں ہوتی، اپنا گھر اپنی چھت نہ ہوتو انسان کو وہ کمی محسوس ہوتی ہے جس کا لفظوں میں بیان مشکل ہے۔
انہوں نے کہا کہ سیکرٹری ہاؤسنگ اور متعلقہ حکام نے منصوبے پر بہت محنت سے کام کیا ہے، شہری علاقوں میں 1سے 5مرلے تک زمین ہے تو حکومت آپ کو 15لاکھ دے گی جس کو 7سال کی آسان اقساط میں دینا ہے، اس کی ماہانہ قسط 14ہزار روپے ہے،اس قرضے پر زیرو سود اور انٹرسٹ ہے، حکومت سروس چارجز بھی خود ادا کرے گی کوئی چارجز،انٹرسٹ اور سود ادا نہیں کرنا پڑیں گے۔
اسی طرح دیہاتی علاقوں میں بھی 1 سے 10مرلے زمین والوں کو قرضہ دیا جائے گا۔ انہوں نے کہاہمیں احساس ہے کہ کم آمدنی والے افراد کو مشکلات کا سامنا کرنا پڑتا ہے، ہم نے بجلی بلوں میں بھی 45سے50ارب روپے کا ریلیف دیں گے، ہم تاریخ کا سب سے بڑا سولر پروگرام بھی لارہے ہیں۔
انہوں نے کہا کہ ہم نے سکیم میں بینک کو نہیں ڈالا،کیونکہ ان کے اپنے لوازمات آجاتے ہیں، ہم نے اپلائی کرنے کا پراسیس بھی آسان کردیا ہے، پنجاب کے تمام شہروں میں یہ پروگرام ایک ساتھ شروع کرنے جارہی ہوں۔
انہوں نے کہا کہ آپ کے پاس زمین کا ٹکڑا ہے تو معلومات متعلقہ ڈی سی آفس سے لے سکتے ہیں، میں زمین کا ٹکڑا دیکھ آئی ہوں،جس پر جلد کنسٹرکشن شروع کریں گے۔ انہوں نے کہا کہ اگر کسی زمین کیلئے قرضہ چاہئے تو وہ بھی ہم دیں گے۔
انہوں نے کہا کہ خواب،خواہش اور ارادہ ہے سکیم کو آئندہ 5سال میں پورے پنجاب تک لے کر جائیں گے، اپنا گھر اپنی چھت ہم پانچ چھ بڑے اضلاع میں شروع کرنے جارہے ہیں، پہلے تین ماہ قسط ادا نہیں کرنی۔ انہوں نے کہا کہ اللہ کے فضل سے ہرچیز میں پنجاب سبقت حاصل کررہا ہے، پنجاب کو دیکھ کر لوگوں کی دوڑیں لگی ہوئی ہیں۔
انہوں نے کہا کہ میں روزانہ کی بنیاد پر ہر سکیم کو فالو اپ لیتی ہوں، نہ خود آرام سے بیٹھتی ہوں نہ اپنی ٹیم کو بیٹھنے دیتی ہوں، آپ دیکھیں گے آئندہ دنوں میں گزشتہ 6ماہ کی محنت رنگ لائے گی، اللہ ہمیں اس نیک مقصد میں کامیاب کرے اورپنجاب کے عوام کیلئے مجھے خوشی کا باعث بنائے۔
