پشاور: سپیکر خیبرپختونخوا اسمبلی بابر سلیم سواتی نے گورنر خیبرپختونخوا کی جانب سے نومنتخب ارکان اسمبلی سے حلف لینے پر تحفظات کا اظہار کرتے ہوئے چیف جسٹس سپریم کورٹ کو خط تحریر کردیا۔
خط میں موقف اپنایا گیا ہے کہ پشاور ہائی کورٹ کے چیف جسٹس کے احکامات غیرقانونی ہیں ،ان کے ذریعے حلف برداری عمل میں آئین سے تجاوز کیا گیا۔خط میں کہا گیا ہے کہ آئین کے آرٹیکل 130اور 255کے مطابق ارکان اسمبلی سے حلف لینے کا اختیار صرف سپیکر کو حاصل ہے نہ کہ گورنر کو۔
خط میں کہا گیا ہے کہ گورنر کا حلف لینا آئینی حدود سے تجاوز اور پارلیمانی اختیارات میں مداخلت ہے، اس غیر آئینی اقدام کیخلاف آئینی راستہ اختیار کیا جا رہا ہے اور معاملے پر عدالت سے رجوع کیا جائے گا۔خط میں چیف جسٹس سے آئینی خلاف ورزی کا فوری نوٹس لینے کا مطالبہ کرتے ہوئے کہا گیا ہے کہ یہ صرف حلف برداری یا کسی اجلاس کا معاملہ نہیں بلکہ آئینی دائرہ کار اور پارلیمانی وقار کے تحفظ کا سوال ہے، خیبرپختونخوا اسمبلی اپنی خودمختاری کے دفاع کیلئے ہر قانونی اور آئینی راستہ اختیار کرے گی، تاکہ آئندہ کسی بھی غیر مجاز مداخلت کی گنجائش نہ رہے۔
