معروف بھارتی اداکارہ شیفالی زری والا کی موت جون 2025 میں اچانک واقع ہوگئی تھی جس کو تقریباً ایک سال ہونے کو آ رہا ہے لیکن یہ معاملہ ایک بار پھر خبروں کی زینت بن گیا ہے۔
میڈیکل رپورٹس میں مقبول فلمی گانے کانٹا لگا سے شہرت حاصل کرنیوالی شیفالی کی موت کی وجہ کارڈیک اریسٹ بتائی گئی تھی جس میں اچانک حرکتِ قلب بند ہوجاتی ہے اور انسان کی اسی وقت موت واقع ہوجاتی ہے تاہم اب شیفالی کے شوہر پراگ تیاگی نے ایک حیران کن دعویٰ کیا ہے جو طبی رپورٹ سے ہٹ کر ایک نیا لیکن متنازع پہلو ہے۔
حالیہ پوڈکاسٹ میں پراگ تیاگی نے دعویٰ کیا کہ وہ اپنی اہلیہ کی موت کو صرف طبی وجہ تک محدود نہیں سمجھتے بلکہ شیفالی پر کالا جادو کیا گیا تھا، بہت سے لوگ ان چیزوں پر یقین نہیں کرتے مگر میں کرتا ہوں، جہاں بھگوان ہے، وہاں شیطان بھی ہے۔
انہوں نے کہا کہ مجھے لگتا نہیں بلکہ پورا پورا یقین ہے کہ کسی نے کچھ (جادو) کیا تھا، کسی نے تو ضرور کیا ہے، متعدد مواقع پر مجھے احساس ہوا کہ کچھ غیر معمولی ہو رہا ہے، کچھ تو گڑبڑ ہے۔
انہوں نے کہا کہ ایک بار تو ہم اس شیطانی چکر سے نکل آئے تھے لیکن اس بار معاملہ کچھ زیادہ ہی بھاری لگتا تھا، عبادت کے دوران بھی انہیں شیفالی میں کچھ تبدیلیاں محسوس ہوئیں، میں بھکتی میں بیٹھتا ہوں تو مجھے احساس ہو جاتا ہے کہ کچھ ٹھیک نہیں ہے۔
دوسری جانب طبی ماہرین اور اسپتال حکام اب بھی اپنی ابتدائی رپورٹ پر قائم ہیں کہ شیفالی کی موت دل کے دورے کے باعث ہوئی تھی۔
