قطر کے دارالحکومت دوحہ میں جاری ایشین شاٹ گن چیمپئن شپ کے ٹریپ ایونٹ میں پاکستانی شوٹر نے شاندار کارکردگی کا مظاہرہ کیا اور گولڈ میڈل جیت کر نیا ورلڈ ریکارڈ قائم کر دیا۔
میچ میں پاکستانی شوٹر کرنل فرخ ندیم نے انفرادی ٹریپ مقابلوں میں کوالیفائنگ رانڈ میں 125 میں سے 119 سکور کئے جبکہ فائنل میں 30 میں سے 27 پوائنٹس حاصل کر کے سب کو پیچھے چھوڑ دیا، ان کی اس غیر معمولی کارکردگی کی وجہ سے نہ صرف انکو گولڈ میڈل ملا بلکہ انہوں نے عالمی ریکارڈ بھی اپنے نام کردیا، پاکستان شوٹنگ فیڈریشن کے مطابق ایشین شاٹ گن چیمپئن شپ نئے فارمیٹ کے تحت منعقد کی جا رہی ہے اسی وجہ سے کرنل فرخ ندیم کا قائم کردہ یہ سکور نیا ورلڈ ریکارڈ تسلیم کیا جائیگا، اس تاریخی کامیابی پر کھیلوں کے حلقوں اور شائقین کی جانب سے کرنل فرخ ندیم کو زبردست خراجِ تحسین پیش کیا جا رہا ہے۔
