بھارت کی خارجہ پالیسی کو ایک بار پھر عالمی سطح پر ناکامی سے دوچار ہونا پڑ رہا ہے اور انتہا پسند نظریات اور مبینہ ناکام سفارتکاری کے باعث بھارت کی پوزیشن کمزور دکھائی دے رہی ہے۔
حال ہی میں پولینڈ کے نائب وزیراعظم اور وزیر خارجہ راڈوسواف سیکورسکی نے نئی دہلی کے بیانیہ کو چیلنج کر دیا ہے جس میں بھارت کے بعض اقدامات پر تحفظات کا اظہار کیا گیا ہے۔
غیر ملکی میڈیا کے مطابق نئی دہلی میں ہونیوالی ملاقات کے دوران بھارت اور پولینڈ کے درمیان سفارتی اختلافات کھل کر سامنے آئے، صحافیوں سے گفتگو میں پولینڈ کے نائب وزیراعظم نے واضح کیا کہ بھارت نے روس میں ہونیوالی زاپاد 2025فوجی مشقوں میں شرکت کی جنہیں پولینڈ اور اسکے اتحادی خطرناک سمجھتے ہیں، اگرچہ دہشتگردی کے معاملے پر عمومی طور پر دونوں ممالک کی سوچ میں مماثلت پائی جاتی ہے تاہم بھارت کے بعض اقدامات پر پولینڈ کو سنجیدہ تحفظات ہیں، یہ تحفظات خطے کے امن و استحکام سے جڑے ہوئے ہیں۔
سیاسی مبصرین کا کہنا ہے کہ پولینڈ کے نائب وزیراعظم کا بیان اس تاثر کو تقویت دیتا ہے کہ بھارت کی خارجہ پالیسی تضادات کا شکار ہے اور بعض عالمی حلقوں میں اسے خطے میں عدم استحکام پیدا کرنیوالے ملک کے طور پر دیکھا جا رہا ہے۔
