متحدہ عرب امارات کے بعد بحرین نے بھی امریکی صدر ڈونلڈ ٹرمپ کے مجوزہ غزہ بورڈ آف پیس میں شمولیت کی امریکی دعوت قبول کر لی ہے۔
بحرین کی وزارتِ خارجہ کے مطابق امریکا کی جانب سے دی گئی غزہ بورڈ آف پیس میں شمولیت کی دعوت کو شاہِ بحرین حماد بن عیسی آل خلیفہ نے قبول کر لیا ہے۔
بحرینی وزارتِ خارجہ کے مطابق مملکت بحرین کا یہ فیصلہ غزہ کیلئے امریکی صدر ٹرمپ کے 20نکاتی امن منصوبے پر مکمل عملدرآمد کی حمایت کے عزم کی عکاسی کرتا ہے، منصوبہ فلسطینی عوام کے جائز حقوق کے تحفظ کیلئے نہایت اہم قرار دیا جا رہا ہے۔
وزارتِ خارجہ کے مطابق بحرین کو امید ہے کہ بورڈ آف پیس اپنے اہداف حاصل کریگا جن میں باہمی تعاون کا فروغ، خطے میں استحکام کی حمایت اور سب کیلئے ترقی و خوشحالی کا حصول شامل ہے۔
غیر ملکی میڈیا کے مطابق امریکا مختلف عالمی رہنمائوں سے مطالبہ کر رہا ہے کہ وہ صدر ٹرمپ کی سربراہی میں قائم اس بورڈ کا حصہ بنیں اور رکن ممالک کی مدتِ رکنیت زیادہ سے زیادہ تین سال ہوگی جبکہ بورڈ میں مستقل نشست کیلئے ایک ارب ڈالر فیس بھی مقرر کی گئی ہے۔
