پاکستان کی جانب سے بھارت کیلئے اپنی فضائی حدود کے استعمال پر پابندی لگانے، آپریشن سندور میں مکمل ناکامی اور مسلسل مالی نقصان کے بعد بھارتی حکومت شدید دباء اور بوکھلاہٹ کا شکار دکھائی دے رہی ہے جبکہ فضائی حدود کی بندش نے بھارتی ایوی ایشن سمیت سیاسی و عسکری قیادت کی کمزوریاں بھی بے نقاب کر دی ہیں۔
غیر ملکی میڈیا کے مطابق فضائی حدود کی بندش سے ایئر انڈیا کو 4 ہزار کروڑ روپے سے زائد کا نقصان پہنچا ہے اور ائیر انڈیا نے اس نقصان کی تلافی کیلئے بھارتی حکومت سے معاوضے کی درخواست بھی کر دی ہے۔
بھارتی میڈیا نے اعتراف کیا ہے کہ پاکستان کی جانب سے فضائی حدود بند کئے جانے کے بعد ایئر انڈیا کو 4 ہزار کروڑ روپے سے زائد کا بھاری مالی نقصان پہنچا۔
پاکستان کی فضائی پابندی کے باعث ائیر انڈیا کو چین کی فضائی حدود استعمال کرنے کیلئے حکومت سے باقاعدہ منظوری لینا پڑ رہی ہے جبکہ طویل روٹس نے اخراجات کئی گنا بڑھا دیے ہیں۔
غیر ملکی میڈیا کے مطابق پاکستان کی پابندیوں کے باعث ایئر انڈیا کے ایندھن کے اخراجات میں 29 فیصد اضافہ ہوگیا ہے جبکہ بھارتی ائیر لائن کو سالانہ ساڑھے 45 کروڑ ڈالر تک کا نقصان برداشت کرنا پڑ رہا ہے۔
فضائی حدود کی بندش کی وجہ سے امریکا، کینیڈا اور یورپ کیلئے ایئر انڈیا کی پروازیں طویل روٹس اختیار کرنے پر مجبور ہیں جس سے اخراجات میں نمایاں اضافہ ہوا ہے۔
نقصان کم کرنے کیلئے ایئر انڈیا نے چین سے سنکیانگ کی فضائی حدود کھولنے کی درخواست کی ہے اور اس سلسلے میں لابنگ بھی شروع کردی ہے تاہم چینی دفترِ خارجہ نے بھارت کی درخواست سے لاعلمی کا اظہار کیا ہے۔
