بچوں کے عالمی دن کے موقع پر اداکارہ اور یونیسف پاکستان کی نیشنل ایمبیسیڈر برائے چائلڈ رائٹس صبا قمر نے کہا ہے کہ ہر بچے کو سیکھنے، صحتمند ماحول میں پروان چڑھنے، محفوظ زندگی گزارنے اور اپنے مستقبل سے متعلق فیصلوں کیلئے آواز اٹھانے کا حق حاصل ہے۔
انہوں نے سوشل میڈیا پر شیئر کی گئی ایک ویڈیو میں عوام سے اپیل کی کہ وہ بچوں کے حقوق کے تحفظ کیلئے ایک ساتھ کھڑے ہوں۔
انہوں نے پاکستان میں بچوں کے حقوق اجاگر کرنے پر زور دیا۔
اپنے پیغام میں انکا کہنا تھا کہ اعداد و شمار کے مطابق پاکستان میں تقریبا 1.9 کروڑ بچیاں کم عمری کی شادیوں کا شکار ہیں جبکہ نصف سے زیادہ کم عمر لڑکیاں 18 سال سے پہلے ہی حمل کا سامنا کرتی ہیں، جو ماں اور بچے دونوں کیلئے خطرناک ثابت ہو سکتا ہے۔
اداکارہ نے عوام سے درخواست کی کہ وہ ملک بھر میں پاکستان کو نیلا بنا کر ایسی بچوں اور بچیوں سے یکجہتی کا اظہار کریں جو ورلڈ چلڈرنز ڈے کی علامتی پہچان ہے۔
صبا قمر نے بچوں کی تعلیم، ذہنی صحت، صنفی مساوات، کم عمری کی شادی اور تشدد جیسے مسائل کے بارے میں آگاہی بڑھانے کے عزم کا اظہار کیا ہے۔
