پاکستانی شوبز انڈسٹری کے معروف اداکار احسن خان نے ذہنی صحت کے مسائل سے انکار کرنیوالوں پر شدید تنقید کرتے ہوئے کہا ہے کہ ہمارے معاشرے میں دماغی صحت کو مسئلہ نہیں سمجھا جاتا، لوگ بڑی آسانی سے کہہ دیتے ہیں کہ یہ بیماری نہیں ہے۔
ایک نجی ٹی وی شو میں ذہنی صحت کے مسائل سے متعلق انہوں نے کہا کچھ لوگ یہ بھی کہتے ہیں کہ آپ مسلمان ہیں، آپکو یہ بیماری نہیں ہو سکتی تو میں ایسے لوگوں سے ہمیشہ یہ پوچھتا ہوں کہ کیا مسلمانوں کو ذیابیطس نہیں ہو سکتی؟ کیا وہ ہائی بلڈ پریشر کا شکار نہیں ہوتے؟ کیا انہیں دوسری بیماریاں نہیں لگتی یا وہ زخمی نہیں ہوتے؟۔
انہوں نے مزید کہا کہ آپ دماغی صحت کے مسائل کی وجہ سے ہونیوالے زخم دیکھ نہیں سکتے لیکن کیا اس کا مطلب یہ ہے کہ یہ کوئی بیماری نہیں ہے؟۔
اگر انسان کے جسم میں کیمیائی توازن بگڑ رہا ہو، کسی قسم کی غذائیت کی کمی ہو یا معدے میں کوئی مسئلہ ہو تو یہ مسائل بھی ڈپریشن کا باعث بن سکتے ہیں اور اس صورتحال میں انسان کا علاج میڈیکل سائنس کی مدد سے کر سکتے ہیں اور جہاں تک روحانی علاج کا تعلق ہے تو قرآن پاک سے بہتر کوئی علاج نہیں ہے۔
