پاکستان ٹیلی کمیونیکیشن اتھارٹی ملک بھر میں اپنے صارفین کو انٹرنیٹ اور موبائل سروس کی بہترین سہولیات کی فراہمی کیلئے کوشاں ہے اور ناقص سروس کی فراہمی پر ٹیلی کام کمپنیوں کیخلاف کارروائیاں بھی جاری ہیں۔
ایک رپورٹ کے مطابق پی ٹی اے کی جانب سے گزشتہ 5 برس میں ٹیلی کام کمپنیوں پر غیر معیاری سروس پر 6 کروڑ 89 لاکھ روپے کے جرمانے عائد کئے گئے ہیں جبکہ موبائل فون سروس متاثر ہونے اور انٹرنیٹ مسائل کے حوالے سے سامنے آنیوالی تفصیلات کے مطابق ملک بھر کی 9 ہزار موبائل سائٹس نیٹ ورک دستیابی کے مسائل کا شکار ہیں، طویل لوڈشیڈنگ اور رائٹ آف وے مسائل سے نیٹ ورک دستیابی متاثر ہیں، تجارتی بجلی کی محدود رسائی، چوری اور تخریب کاری کے واقعات کی وجہ سے بھی نیٹ ورک متاثر ہیں، کے پی، بلوچستان اور جی بی میں سروس کا معیار خطرناک حد تک گر گیا ہے۔
آپریٹرز کے دعوئوں کے باوجود نیٹ ورک دستیابی لائسنس معیار تک نہیں پہنچ سکی ہے۔
پہلی ششماہی میں پی ٹی اے کو سروس سے متعلق 8 ہزار سے زائد شکایات ملیں جس میں سے 99.17 فیصد شکایات حل کی گئیں۔
پی ٹی اے کے جرمانے سے متعلق 11 کیس تاحال عدالتوں میں زیرِ سماعت ہیں۔
