سوڈان میں الفاشر شہر میں مسجد پر ڈرون حملے کے نتیجے میں75سے زائد نمازی شہید ہوگئے۔ غیر ملکی میڈیا کے مطابق سوڈانی فوج کی چھٹی انفنٹری ڈویژن نے بتایا ہے کہ ملیشیا نے صفیہ مسجد میں نمازِ کے دوران نمازیوں کو نشانہ بنایا جس کے نتیجے میں 75سے زائد شہری شہید جبکہ سینکڑوں زخمی ہوئے۔
حکام کے مطابق الفاشر شمالی دارفور کا دارالحکومت اور خطے میں فوج کا آخری بڑا گڑھ ہے جہاں آر ایس ایف مئی 2024 سے محاصرہ کیے ہوئے ہے، فوجی تنصیبات کو نشانہ بنانے کی کوششوں میں ہسپتال، سکول اور بے گھر افراد کے مراکز بھی متاثر ہوئے ہیں۔
مقامی رضا کاروں کے مطابق نمازیوں کی لاشیں مسجد کے ملبے سے نکالی گئی ہیں۔سوڈان ڈاکٹرز نیٹ ورک نے واقعہ کو غیر مسلح شہریوں کے خلاف سنگین جرم قرار دیتے ہوئے کہا کہ آر ایس ایف کی یہ کارروائی انسانی اور مذہبی اقدار و عالمی قوانین کی کھلی خلاف ورزی ہے۔
دوسری جانب اقوام متحدہ نے خبردار کیا کہ سوڈان کی خانہ جنگی میں نسلی تشدد بڑھ رہا ہے جس میں عام شہری سب سے زیادہ متاثر ہو رہے ہیں۔
