لاہور: وزیراعلی پنجاب مریم نواز نے کہا ہے کہ عوامی بھلائی کے منصوبوں کی شفافیت،عملدرآمد کی رفتار،معیار پر کوئی سمجھوتہ نہیں ہو گا۔تفصیلات کے مطابق وزیر پنجاب مریم نواز کی زیر صدارت پلاننگ اینڈ ڈویلپمنٹ پر 7 گھنٹے طویل اجلاس کا انعقاد ہوا جس میں 77 اقدامات، 70 منصوبوں اور 7 پروگرامز پر پیشرفت کا جائزہ لیا گیا۔
سینئر وزیر پنجاب حکومت مریم اورنگزیب نے اجلاس کو بریفنگ دیتے ہوئے بتایا کہ پی ڈی ڈبلیو پی کے 28 اجلاس ہوئے، پنجاب میں عوام کی بھلائی کی 287 سکیموں پر غور کیا گیا، زراعت، موسمیات اور آئی ٹی سمیت مختلف شعبوں میں ترقی کا تفصیلی جائزہ لیا گیا ہے، ترقیاتی سکیموں کیلئے 278 ارب روپے مختص کئے گئے جبکہ اب تک 83 ارب روپے جاری کئے جاچکے ہیں۔
شرکاء کو بتایا گیا کہ جدید ٹیکنالوجی، ڈرون اور جی آئی ایس میپنگ سے مانیٹرنگ کو متعارف کرایا جا رہا ہے، منصوبوں پر پیشرفت وقت کے واضح تعین کے ساتھ یقینی بنائی جائے گی۔
اس موقع پر گفتگوکرتے ہوئے وزیراعلی مریم نواز نے کہا کہ عوام کی بھلائی کے منصوبوں کی شفافیت،عمل درآمد کی رفتار اور معیار پر بھی کوئی سمجھوتہ نہیں کیا جائے گا۔
