نئی دہلی: بھارتی دارالحکومت نئی دہلی میں ایک مصور نے فلمی انداز میں اپنی بیوی کو مبینہ طور پر غیر مرد سے تعلقات کے شک میں قتل کر کے لاش دفنا دی۔
بھارتی میڈیا کے مطابق ملزم نے پولیس کے سامنے اقرار جرم کرتے ہوئے بتایا کہ مجھے شبہ تھا کہ میری بیوی کے کسی اور کے ساتھ تعلقات ہیں، اسی بنا پر میں نے اس کا قتل کر دیا۔
پولیس کے مطابق ملزم نے پہلے اپنی بیوی کو نشہ آور گولیاں دیں اور اسے کئی دن تک نشے کی حالت میں قید رکھا، اس دوران اسے کیڑے مار دوائی بھی کھلائی گئی، جب مقتولہ کی طبیعت بگڑ گئی تو ایک کمپاونڈر کے پاس لے جایا گیا اور خودکشی کا ڈرامہ رچا کر واپس گھر لایا گیا۔
یکم اگست کو خاتون کی موت واقع ہو گئی اور اگلی رات اس کے شوہر نے اپنے ساتھیوں کے ساتھ مل کر بیوی کی لاش کو ایک قبرستان میں دفنا دیا۔ بھارتی میڈیا کے مطابق پولیس نے مقتولہ کے شوہر اور اس کے ساتھیوں کو گرفتار کر کے تفتیش شروع کر دی ہے۔
