اسلام آباد: وزیراعظم شہباز شریف نے غزہ پر اسرائیل کی جارحانہ کارروائیوں کی شدید الفاظ میں مذمت کرتے ہوئے کہا ہے کہ القدس کے دارالحکومت کے طور پر آزاد فلسطینی ریاست کا قیام ہی مسئلے کا پائیدار حل ہے۔
تفصیلات کے مطابق وزیراعظم شہباز شریف سے فلسطین کے سبکدوش ہونیوالے سفیر احمد جواد عبد العزیز رابعی نے ملاقات کی جس میں وزیراعظم نے فلسطینی عوام اور ان کے حق خود ارادیت کیلئے پاکستان کی غیر متزلزل حمایت کا اعادہ کیا۔
وزیراعظم نے 7 اکتوبر 2023ء سے غزہ میں معصوم فلسطینیوں کیخلاف اسرائیل کی جارحانہ کارروائیوں کی شدید مذمت کی جس کے نتیجے میں خواتین اور بچوں سمیت 40ہزار سے زائد بیگناہ فلسطینی شہید اور 90ہزار سے زائد زخمی ہوئے۔
وزیراعظم نے دو ریاستی حل کے ذریعے مسئلہ فلسطین کا منصفانہ اور دیرپا حل تلاش کرنے کی کوششوں کیلئے پاکستان کے پختہ عزم اور حمایت کا اعادہ کیا۔وزیراعظم نے کہا کہ اقوام متحدہ کی متعلقہ قراردادوں کے مطابق 1967ء سے پہلے کی سرحدوں اور القدس کے دارالحکومت کے طور پر فلسطین کی ایک آزاد ریاست کا قیام ہی مسئلے کا پائیدار حل ہے۔
اس موقع پر احمد جواد عبد العزیز رابعی نے اپنے پانچ سالہ دور تعیناتی میں پاکستان کی جانب سے بہترین مہمان نوازی پر وزیراعظم کا شکریہ ادا کرتے ہوئے فلسطین پر تاریخی و مستقل موقف اور خطے میں امن و استحکام کیلئے عالمی کوششوں میں پاکستان کے کردار کو سراہا۔
انہوں نے فلسطینی طلباء کو پاکستان میں تعلیم مکمل کرنے کیلئے تمام سہولیات فراہم کرنے اور وظائف کی پیشکش پر حکومت پاکستان کا شکریہ ادا کیا۔
