راولپنڈی:مسلح افواج، چیئرمین جوائنٹ چیفس آف سٹاف کمیٹی، سروسز چیفس نے پائلٹ افسر راشد منہاس (نشان حیدر)کے 53 ویں یوم شہادت پر انہیں خراج عقیدت پیش کرتے ہوئے کہا ہے کہ شہیدراشد منہاس ملکی تاریخ میں جرات، قربانی کی روشن مثال کے طور پر ہمیشہ زندہ رہیں گے۔
آئی ایس پی آر کے مطابق پائلٹ آفیسر راشد منہاس کے 53 ویں یوم شہادت پر مسلح افواج، چیئرمین جوائنٹ چیفس آف سٹاف کمیٹی اور سروسز چیفس نے انہیں خراج عقیدت پیش کرتے ہوئے کہا ہے کہ پائلٹ آفیسر راشد منہاس پاکستان کی تاریخ میں جرات اور قربانی کی روشن مثال کے طور پر ہمیشہ زندہ رہیں گے، انہوں نے آج کے دن 1971ء میں ملکی دفاع کے دوران اپنی جان کا نذرانہ پیش کیا جو ان کی بے مثال بہادری اور وطن کے تحفظ کیلئے غیر متزلزل عزم کی عکاسی کرتا ہے، جب ہم اس قومی ہیرو کو خراج عقیدت پیش کرتے ہیں، تو ہم ان کی غیر معمولی بہادری کے اس عمل کو یاد کرتے ہیں۔
بیان میں کہا گیا ہے کہ شہید کی قربانی ہمیشہ ہماری تاریخ کا حصہ رہے گی اور آنے والی نسلوں کو ان کی مثالی بہادری اور وفاداری کو اپنانے کی ترغیب دے گی۔
آئی ایس پی آر نے کہا ہے کہ پاکستان کی مسلح افواج پائلٹ آفیسر راشد منہاس کو غیر معمولی بہادری، ثابت قدمی اور فرض کے تئیں لگن کو سلام پیش کرتی ہیں اوران کے ورثے سے تحریک حاصل کرتے ہوئے پیشہ ورانہ مہارت اور قوم کے ساتھ لگن کے اعلیٰ ترین معیار کو برقرار رکھنے کا عزم کرتی ہیں۔
