راولپنڈی: بلوچستان میں سیکیورٹی فورسز کے آپریشن میں ڈپٹی کمشنر پنجگور ذاکر علی کی شہادت میں ملوث بی ایل اے کے تین دہشت گرد ہلاک اور تین زخمی ہوگئے۔آئی ایس پی آر کی جانب سے جاری بیان کے مطابق 18 اور 19 اگست کی درمیانی شب سیکیورٹی فورسز نے ضلع مستونگ میں ایک انٹیلی جنس بیسڈ آپریشن کیا جس دوران شدید فائرنگ کے تبادلے میں بلوچ لبریشن آرمی کے تین دہشت گرد ہلاک اور تین زخمی ہوگئے۔
آئی ایس پی آر کے مطابق یہ دہشت گرد علاقے میں متعدد دہشت گردانہ سرگرمیوں میں ملوث تھے اور 12 اگست کو ڈپٹی کمشنر پنجگور ذاکر علی کی شہادت کے بھی ذمہ دار تھے۔
آئی ایس پی آر کے مطابق اس آپریشن کے ذریعے مجرموں سے ان کی اس گھناؤنی کارروائی کا بدلہ لے کر انہیں انصاف کے کٹہرے میں لا کھڑا کیا ہے۔بیان کے مطابق پاکستان کی سیکیورٹی فورسز قوم کے شانہ بشانہ بلوچستان میں امن، استحکام اور ترقی کے دشمنوں کی سازشوں کو ناکامژبنانے کے لیے پرعزم ہیں۔
