پاکستان جلد اپنی تاریخ کا پہلا پانڈا بانڈ بھی متعارف کرانے کی تیاری کر رہا ہے۔
وزارت خزانہ کی جانب سے جاری بیان میں کہا گیا ہے کہ پاکستان 4سال کے وقفے کے بعد دوبارہ عالمی بانڈ مارکیٹ میں جانے کی تیاری کر رہا ہے جو اس بات کی عکاسی کرتا ہے کہ ملکی معیشت میں استحکام آیا ہے حالانکہ چند سال قبل پاکستان ڈیفالٹ کے قریب پہنچ گیا تھا۔
وفاقی وزیر خزانہ محمد اورنگزیب نے کہا ہے کہ حکومت کی ترجیح برآمدات میں اضافہ اور درآمدات پر انحصار کم کرنا ہے، ہمیں اصلاحات کے راستے پر قائم رہنا ہوگا کیونکہ یہی پائیدار ترقی کا واحد حل ہے، حکومت آئندہ چند ہفتوں میں مالی مشیروں کے انتخاب کیلئے تجویز جاری کریگی۔
ایک بیان میں انہوں نے کہاکہ حکومت اس بات کا جائزہ لے رہی ہے کہ ڈالر، یورو یا اسلامی سکوک بانڈ جاری کیا جائے، یہ اقدامات پاکستان کی عالمی مالیاتی منڈیوں میں واپسی کا عندیہ ہیں، سوئٹزرلینڈ کے شہر ڈیوس میں ورلڈ اکنامک فورم کے موقع پر وزیراعظم زیر کی قیادت پاکستانی وفدعالمی سرمایہ کاروں کو پیغام دے رہا ہے کہ پاکستان کی معیشت بہتر ہو چکی ہے اور معدنیات، زراعت اور ٹیکنالوجی کے شعبوں میں سرمایہ کاری کیلئے تیار ہے۔
انکا کہنا تھا کہ پاکستان نے معاشی استحکام کے میدان میں اہم کامیابیاں حاصل کی ہیں، مہنگائی، شرح سود، مالی خسارہ اور کرنٹ اکائونٹ سمیت تمام بڑے معاشی اشاریے بہتر سمت میں جا رہے ہیں، پاکستان 2022کے بعد عالمی بانڈ مارکیٹ سے تقریبا ًباہر ہو گیا تھا تاہم آئی ایم ایف کے پروگرامز کے تحت سخت مالی اصلاحات کی گئیں، حکومت نے دوبارہ پرائمری مالی سرپلس حاصل کیا ہے اور عالمی ریٹنگ ایجنسیوں نے پاکستان کی درجہ بندی میں بہتری کی ہے، زرمبادلہ کے ذخائر جون تک 3 ماہ کی درآمدات کے برابر ہو جانے کی توقع ہے جو عالمی معیار سمجھا جاتا ہے۔
انہوں نے کہا کہ روپے پر فوری دبائو نہیں ہے کیونکہ ادائیگیوں کا توازن بہتر ہوا ہے، ترسیلاتِ زر میں اضافہ ہوا ہے اور سروسز کی برآمدات بڑھ رہی ہیں جبکہ روپیہ گزشتہ تقریباً ڈیڑھ سال سے مستحکم ہے، معاشی استحکام کیساتھ ساتھ طویل عرصے سے التوا کا شکار اصلاحات بھی کی جا رہی ہیں جن میں سرکاری اداروں کی نجکاری اور ٹیکس نیٹ کو وسیع کرنا شامل ہے، قومی ایئرلائن کو گزشتہ ماہ فروخت کر دیا گیا ہے اب حکومت نیویارک کے روزویلٹ ہوٹل میں اپنا حصہ فروخت کرنے، بڑے ہوائی اڈوں کے انتظامات آئوٹ سورس کرنے اور تقریباً 2درجن دیگر سرکاری اداروں کی نجکاری پر غور کر رہی ہے۔
