چیف آف ڈیفنس فورسز فیلڈ مارشل سید عاصم منیر نے مضبوط، پیشہ ور اور عوام دوست پولیس کو داخلی سلامتی اور قانون کی حکمرانی کیلئے ناگزیر قرار دیتے ہوئے کہا ہے کہ امن و امان کا قیام مقدس ذمہ داری ہے ،مسلح افواج پاکستان کے بہادر پولیس اہلکاروں کے شانہ بشانہ کھڑی ہیں۔
آئی ایس پی آر سے جاری بیان کے مطابق فیلڈ مارشل سید عاصم منیر نے وفاقی وزیر داخلہ محسن نقوی کے ہمراہ نیشنل پولیس اکیڈمی اسلام آباد کا دورہ کیا، فیلڈ مارشل نے پولیس سروس آف پاکستان کے افسران سے ملاقات اور تبادلہ خیال کیا۔
ترجمان کے مطابق نیشنل پولیس اکیڈمی پہنچنے پر کمانڈنٹ نیشنل پولیس اکیڈمی نے فیلڈ مارشل کا پرتپاک استقبال کیا جبکہ چاق و چوبند پولیس دستے نے انہیں گارڈ آف آنر پیش کیا۔
ترجمان پاک فوج کے مطابق فیلڈ مارشل نے پولیس شہداء کی یادگار پر پھولوں کی چادر چڑھائی اور فاتحہ خوانی کی اور امن و امان کے قیام، قانون کی بالادستی اور عوام کے تحفظ کیلئے جانوں کا نذرانہ پیش کرنیوالے پولیس شہدا کو خراجِ عقیدت پیش کیا۔
فیلڈ مارشل نے دہشت گردی، جرائم اور داخلی سلامتی کے چیلنجز کے مقابلے میں پولیس اہلکاروں کی عظیم قربانیوں کو سراہا۔
ترجمان کے مطابق دورے کے دوران فیلڈ مارشل کو سکول فار ہائی امپیکٹ ایلیٹ لا انفورسمنٹ ڈویلپمنٹ سمیت پولیس کی تربیتی سرگرمیوں، استعداد کار میں اضافے اور جدیدیت سے متعلق اقدامات پر بریفنگ دی گئی۔
فیلڈ مارشل نے کیڈٹ اسسٹنٹ سپرنٹنڈنٹس آف پولیس سے بھی ملاقات کی۔
اس موقع پر فیلڈ مارشل نے ادارہ جاتی تعاون، جدید پولیسنگ طریقہ کار اور عوامی اعتماد کے فروغ کی اہمیت پر زور دیتے ہوئے کہا کہ پولیس شہریوں کی جان، مال اور عزت کے تحفظ میں پہلی دفاعی لائن کی حیثیت رکھتی ہے۔
انہوں نے کہا کہ مضبوط، پیشہ ور اور عوام دوست پولیس فورس داخلی سلامتی اور قانون کی حکمرانی کیلئے ناگزیر ہے۔
جنرل سید عاصم منیر نے کہا کہ امن و امان کا قیام ایک مقدس ذمہ داری ہے، مسلح افواج پاکستان کے بہادر پولیس اہلکاروں کے شانہ بشانہ کھڑی ہیں۔
ترجمان کے مطابق اس موقع پر سینئر پولیس قیادت نے پولیسنگ معیار کو مزید بہتر بنانے، پیشہ ورانہ صلاحیت میں اضافے اور موجودہ سلامتی چیلنجز سے نمٹنے کیلئے ضروری ادارہ جاتی اصلاحات کے عزم کا اعادہ کیا۔
