پاکستان اور اسلامی ترقیاتی بینک نے اسلام آباد میں 603 ملین ڈالر مالیت کے تین قرض معاہدوں پر دستخط کردیئے۔
پاکستان کی جانب سے معاہدے پر دستخط سیکرٹری اقتصادی امور ڈویژن محمد حمیر کریم جبکہ اسلامی ترقیاتی بینک کی جانب سے دستخط نائب صدر ڈاکٹر رامی احمد نے کئے۔
تقریب میں وفاقی وزیر اقتصادی امور احد خان چیمہ، وفاقی وزیر برائے تخفی ِغربت و سماجی تحفظ سید عمران احمد شاہ اور دیگر اعلی حکام بھی موجود تھے۔
اعلامئے کے مطابق اسلامی ترقیاتی بینک ایم 6 سکھر تا حیدرآباد موٹروے منصوبے کیلئے 475ملین ڈالر کی مالی معاونت فراہم کرے گا، ایم 6 سکھر تا حیدرآباد موٹروے مجوزہ پشاور تا کراچی موٹروے کا اہم حصہ ہے۔
اسلامی ترقیاتی بینک کیساتھ غریب اور سیلاب متاثرہ گھرانوں کو غربت سے نکالنے کا پروگرام شروع کرنے کا بھی معاہدہ ہوا ہے، پروگرام کا مقصد انتہائی غریب خاندانوں کو نقد امداد پر انحصار سے نکال کر پائیدار روزگار، معاشی خودمختاری اور مضبوط معاشی بنیاد فراہم کرنا ہے۔
منصوبہ ملک کے 25 اضلاع میں نافذ کیا جائے گا جس سے 160,866 گھرانے مستفید ہو سکیں گے۔
آزاد جموں و کشمیر میں سکول سے باہر بچوں کے منصوبے کیلئے اسلامی ترقیاتی بینک 10ملین ڈالر فراہم کرے گا جبکہ آزاد جموں و کشمیر میں تقریبا 60 بچوں کو دوبارہ سکول داخل کیا جائے گا اور 4اساتذہ کو تربیت دی جائے گی۔
