امریکی ریاست مشی گن میں شدید برفانی طوفان نے تباہی مچا دی اور ایک ہی شاہراہ پر 30 بھاری ٹرکوں سمیت 100سے زائد گاڑیاں خوفناک حادثے کا شکار ہو گئیں۔
غیر ملکی میڈیا کے مطابق حادثہ اتنا شدید تھا کہ موٹروے مکمل طور پر بند کر دی گئی اور ہر طرف الٹی ہوئی گاڑیاں اور جیک نائف ٹرک بکھرے نظر آئے، سوشل میڈیا پر جاری ڈرون فوٹیج میں دیکھا جا سکتا ہے کہ ہائی وے انٹرسٹیٹ 196 مکمل طور پر برف سے ڈھکی ہوئی ہے جبکہ کئی گاڑیاں سڑک سے پھسل کر کناروں میں جا گریں۔
حکام کے مطابق حادثہ کے وقت 40میل فی گھنٹہ کی رفتار سے ہوائیں چل رہی تھیں اور علاقے میں ایک فٹ سے زائد برف جمع ہو چکی تھی۔
مشی گن سٹیٹ پولیس کے مطابق حادثہ میں متعدد افراد زخمی ہوئے ہیں تاہم خوش قسمتی سے کوئی جانی نقصان رپورٹ نہیں ہوا، پولیس نے موٹروے کو دونوں اطراف سے بند کر دیا جبکہ گاڑیوں کو ہٹانے اور سڑک صاف کرنے میں کئی گھنٹے لگنے کا امکان ظاہر کیا گیا ہے، مسلسل برفباری کے باعث وہاں پھنسے مسافروں کو بسوں کے ذریعے قریبی ہائی سکول منتقل کیا گیا جہاں عارضی پناہ کا انتظام کیا گیا۔
ادھر امریکا کے وسیع علاقوں میں درجہ حرارت خطرناک حد تک گر چکا ہے، غیر معمولی طور پر فلوریڈا پین ہینڈل تک برفباری ریکارڈ کی گئی، نیشنل ویدر سروس نے شمالی مینیسوٹا سے لیکر وسکونسن، انڈیانا، اوہائیو، پنسلوانیا اور نیویارک تک شدید سردی اور برفانی طوفانوں کی وارننگ جاری کر دی ہے جبکہ آئندہ دنوں میں موسم مزید خراب ہونے کا خدشہ ظاہر کیا جا رہا ہے۔
