عمران خان کی بہنوں نے کہا ہے کہ عمران خان نے قوم کو آخری معرکہ لڑنے کیلئے تیاری کی کال دیتے ہوئے کہا ہے کہ قوم خود کو تیار کر لے، اب وقت آگیا ہے آزادی یا موت کا۔
علیمہ خان، عظمی خان اور نورین خان نے پی ٹی آئی رہنمائوں کے ہمراہ پریس کانفرنس کرتے ہوئے کہا کہ ہم کبھی پریس کانفرنس نہیں کرتے لیکن آج کرنا پڑ رہی ہے، ہم نے بڑے صبر سے کام لیا لیکن اب بات کرنا پڑیگی، بانی پی ٹی آئی کو قید تنہائی میں ڈال دیا گیا ہم سڑک پر اپنا حق مانگ رہے تھے کیونکہ ہمیں عدالت سے اجازت ملی ہے۔
علیمہ خان نے کہا کہ کبھی بھی ہمارے احتجاج سے کسی کو کوئی نقصان نہیں ہوا لیکن اسکے باوجود ہمیں ان سے ملنے کی اجازت نہیں دی جاتی، پچھلے ہفتے بھی میری ڈاکٹربہن کو کئی گھنٹے تک حراست میں رکھا گیا، ہمارے ساتھ ڈیوٹی پر مامور پولیس والے بھی بدتمیزی کرتے ہیں۔
انہوں نے کہا ہم کل وہاں فٹ پاتھ پر بیٹھے تھے پہلے لائٹ بند کردی گئی پھر پانی چھوڑا گیا ہم پانی کے اندر بیٹھے رہے، پہلے میڈیا والوں کو دھکے دیئے پھر کے پی سے آئے وزراء کو دھکے دئیے، کل 12 سال کے بچے نے بتایا کہ پولیس یہاں پانی چھوڑنے والی ہے اطلاع دینے والے بچے کو بھی گرفتار کرلیا گیا، کل پولیس نے ہمارے لوگوں اور منتخب نمائندوں پر تشدد کیا، ایم پی ایز اور ایم این ایز کو مارا گیا، ان حرکتوں سے ہم ڈرنے والے نہیں ہیں، ہمیں عدالتی احکامات کے مطابق بانی تحریک انصاف سے ملنے دیا جائے مگر عورتوں کو بالوں سے پکڑ کر گھسیٹا گیا، چادریں کھینچتے رہے، تمام خواتین اور مردوں کو ایک ہی قیدی وین میں بند کیا گیا یہ ملک ہمارا بھی ہے تو ہمارے ساتھ ایسا سلوک کیوں؟، کیا ایسا کرکے آپ ہم لوگوں کو ڈرا لیں گے؟ 4 اگست کو عمران خان کو کہا گیا آپ بیرون ملک چلے جائیں بانی پی ٹی آئی نے کہا میں ملک چھوڑ کر نہیں جائوں گا، 500 دن تک بانی پی ٹی آئی کا ٹرائل چلا انہوں نے کوئی ڈیمانڈ نہیں کی، ایک شخص اپنے ملک کے لوگوں کیلئے قربانی دے رہا ہے، آپ اسے سیاست کہتے ہیں لیکن وہ شخص قربانی دے رہا ہے، ہمیں اس ملک میں کسی بھی قسم کی غلامی قبول نہیں، ہم اپنے بھائی کو کسی بھی صورت تنہا نہیں رہنے دینگے۔
عظمی خان نے کہا کہ بانی پی ٹی آئی دو ہفتے سے قید تنہائی میں ہیں ہم نے کل درخواست کی کہ ہم انہیں دیکھ آئیں ہمیں تسلی ہو جائیگی، ہمیں مارنا ہے مار دیں جیل میں ڈالنا ہے ڈال دیں، ہم بانی پی ٹی آئی کے معاملے پر کسی پر اعتماد کرنے کیلئے تیار نہیں۔
نورین نیازی نے کہا میرا بیٹا جیل میں ہے میں کہتی ہوں باہر ظلم کا نظام ہے، یہ پاکستان کیساتھ کیا کرنا چاہتے ہیں، یہ اسرائیل کو تسلیم کرنے کا سوچ رہے ہیں اور بانی پی ٹی آئی رکاوٹ ہیں، یہ بانی پی ٹی آئی کو نقصان نہیں پہنچا سکیں گے یہ مایوس ہوچکے ہیں اور چاہتے ہیں کہ بانی پی ٹی آئی کسی طرح معافی مانگ لیں،9 مئی ہمارے خلاف پلان کیا گیا منصوبہ تھا، 26 نومبر اور 9 مئی کو ہوئے ظلم کو کسی صورت نہیں بھولیں گے۔
ملٹری ٹرائل میں گئے لوگ بہادر ہیں وہ کمزوری نہیں دکھا رہے، انسانوں کی زندگیوں میں کھیلنے والوں کو سکون نہیں ملے گا، جتنا ظلم کر چکے ہیں اس کا حساب ہوگا۔
