وزیراعظم شہباز شریف نے آئندہ برس مون سون سے قبل نقصانات سے بچائو کیلئے ابھی سے حفاظتی اقدامات اٹھانے کا حکم اور وزارتِ موسمیاتی تبدیلی کے قلیل المدتی منصوبے کی منظوری دیتے ہوئے کہا ہے کہ پاکستان ترقی پذیر ملک ہے، قیمتی و محدود وسائل ترقی کی بجائے موسمیاتی تبدیلی کے مضر اثرات سے بچائو پر استعمال ہوتے ہیں، وزارت موسمیاتی تبدیلی، منصوبہ بندی اور این ڈی ایم اے صوبائی حکومتوں کیساتھ مل کر مربوط منصوبہ سازی کریں۔
بدھ کو وزیراعظم کی زیر صدارت موسمیاتی تبدیلی کے مضر اثرات سے بچائو کی حکومتی حکمت عملی پر جائزہ اجلاس ہوا جس میں وفاقی وزراء احسن اقبال، احد خان چیمہ، محمد اورنگزیب، ڈاکٹر مصدق ملک، عطا تارڑ اور دیگر اعلی حکام نے شرکت کی۔
اجلاس کو آئندہ برس مون سون کے حوالے سے عالمی اشاریوں پر بریفنگ دی گئی اور وزارت موسمیاتی تبدیلی کی جانب سے قلیل، وسط اور طویل مدتی منصوبوں پر تفصیلی رپورٹ پیش کی گئی۔
وزیراعظم نے پیش کردہ قلیل مدتی منصوبے کی منظوری دی اور فوری عملدرآمد کا حکم دیتے ہوئے کہا کہ وزارت موسمیاتی تبدیلی، وزارت منصوبہ بندی اور این ڈی ایم اے صوبائی حکومتوں کے ساتھ مل کر موسمیاتی تبدیلی کے حوالے سے مربوط منصوبہ سازی کریں۔
وزیراعظم نے پانی کے بہتر انتظام کیلئے قومی سطح پر منصوبہ سازی کیلئے نیشنل واٹر کونسل کے اجلاس کی تیاری کی ہدایت کی۔
وزیراعظم نے کہا کہ پاکستان ترقی پذیر ملک ہے اور ہر تیسرے سال موسمیاتی تبدیلی کے مضر اثرات پر جی ڈی پی کا خاطر خواہ حصہ خرچ کرنا پڑتا ہے، قیمتی و محدود وسائل ترقی کی بجائے موسمیاتی تبدیلی کے مضر اثرات سے بچائو پر استعمال ہوتے ہیں۔
انہوں نے کہا کہ پاکستان جس کا موسمیاتی تبدیلی میں کردار نہ ہونے کے برابر ہے، اس کے اثرات کی لپیٹ میں ہے۔
وزیراعظم نے ہدایت کی کہ آئندہ سال مون سون سے قبل نقصانات سے بچائو کیلئے ابھی سے حفاظتی اقدامات اٹھائے جائیں۔
