) منصورہ میں پریس کانفرنس سے خطاب کرتے ہوئے امیر جماعت اسلامی حافظ نعیم الرحمن نے کہا کہ ملک میں آئینی ترمیم کا سلسلہ جاری ہے،معاملہ کھنچتا چلا جا رہا ہے،ایک کے بعد دوسرا مسودہ آتا ہے بعض اوقات مسودہ بغیر بتائے پتا نہیں کہاں سے آ جاتا ہے؟۔ انہوں نے کہا کہ حکومت مرضی کے جج اور فیصلے چاہتی ہے،اگر ہائی کورٹ کے ججز کا تبادلہ حکومت کے ہاتھ ہوگا تو خود دیکھیں انصاف پر کتنا دباؤ ہوگا۔
انہوں نے کہا کہ پیپلزپارٹی، (ن)لیگ اور جے یو آئی (ف) نے ایک مسودہ متفقہ طورپر اگر پاس کر لیا ہے تو اسے سامنے لایا جائے اس پر اعتراض کیا ہے؟۔ انہوں نے کہا کہ حکومت آئین میں چھیڑ چھاڑ کررہی ہے، ہم 26ویں آئینی ترمیم کو مسترد کرتے ہیں،مک مکا آئینی ترمیم منظور نہیں کریں گے۔ انہوں نے کہا کہ حکومتی دباؤ سے اپنے فیصلے اور خریدو فروخت کا سلسلہ شروع ہوجاتا ہے، اگر کسی کو ایکسٹینشن دینا ہوتو خریدو فروخت کی جاتی ہے، اس وقت پی ٹی آئی اور جے یو آئی (ف) پر دباؤ ہے تو نام واضح کئے جائیں۔
انہوں نے کہاکہ اسٹیبلشمنٹ کے دباؤ پر سیاسی پارٹیاں فیس سیونگ کا نام لیتی ہیں۔ انہوں نے کہا کہ یہ دباؤ میں آئینی ترمیم لا رہے ہیں جس کا مطلب میرٹ نہیں بلکہ حکومتی مرضی ہوگی۔انہوں نے کہا کہ عدالتی اصلاحات یہ ہیں کہ انصاف نہیں مل رہا،لوگ عدالت جانا نہیں چاہتے، فیک نیوز اور جھوٹا الزام لگانے والوں کا احتساب ہونا چاہئے لیکن جب کہیں ریپ کیسز ہوتے ہیں، عدالتوں میں فیصلے نہیں ہوتے،حکومت کچھ نہیں کرتی تو پھر کیسے اعتماد حاصل ہوگا؟۔
انہوں نے کہا کہ ہم فارم 47 والی حکومت کے موقف پر اعتبار کرنے کو تیار نہیں،شہبازشریف اور مریم نواز سمیت سب کو جعلی طریقے سے جتوایا گیا، نوازشریف کو لاہور سے 70ہزار ووٹوں سے جتوایا گیا۔ انہوں نے کہا کہ نجی کالج واقعہ پر لاہور ہائی کورٹ کا فل بینچ بنایا گیا اس کا خیر مقدم کرتے ہیں۔انہوں نے کہاکہ تعلیمی اداروں میں منشیات کے استعمال کا سلسلہ جاری ہے، نوجوان نسل نشے کی عادی بن رہی ہے، کوئی پوچھنے والا نہیں، حکومت اور قومی اداروں کو تعلیمی اداروں کے مسائل حل کرنا ہوں گے۔
