اسلام آباد ہائیکورٹ کے جج جسٹس طارق محمود جہانگیری نے کہاہے کہ سپریم کورٹ اپنی خود مختاری کیلئے کھڑی ہے،غیر جانبداری فیصلوں سے نظر آئے گی جبکہ لاہور ہائیکورٹ کے سابق جج شاہد جمیل نے کہاہے کہ آئینی ترمیم کا جلد انصاف کی فراہمی سے تعلق نہیں، مقصد کچھ اور ہے۔ای
سوی ایشن آف انٹرنیشنل لائرز گلوبل کے زیراہتمام لندن میں منعقدہ کانفرنس میں ’عدلیہ کی آزادی اور منصفانہ ٹرائل‘ کے موضوع پر خطاب کرتے ہوئے اسلام آباد ہائی کورٹ کے جسٹس طارق محمود جہانگیری نے کہا کہ وکلاء کی انٹرنیشنل کانفرنس کا انعقاد خوش آئند ہے، ایسی کانفرنسز کے ذریعے ایک دوسرے سے سیکھنے کا موقع ملتا ہے۔ انہوں نے کہاکہ جج حقائق کی بنیاد پر فیصلے کرتے ہیں، سپریم کورٹ اپنی خود مختاری کیلئے کھڑی ہے۔انہوں نے کہا کہ انصاف کی فراہمی میں کئی مسائل درپیش ہیں تاہم جلد انصاف کی فراہمی کیلئے جدید ٹیکنالوجی کا استعمال کیا جا رہا ہے۔
انہوں نے کہا کہ سپریم کورٹ کی غیر جانبداری اس کے فیصلوں سے نظر آئے گی۔کانفرنس سے خطاب کرتے ہوئے لاہور ہائیکورٹ کے سابق جج شاہد جمیل نے کہاکہ آئینی ترمیم سے عدلیہ کی آزادی پر سمجھوتہ،سپریم کورٹ کے اختیارات کم ہوں گے۔انہوں نے کہاکہ آئینی ترمیم کا جلد انصاف کی فراہمی سے تعلق نہیں، اس کا مقصد کچھ اور ہے، کاش یہ اسی طرح جلد انصاف کی فراہمی کیلئے بھی مل کر بیٹھیں۔
