رحیم یار خان میں قانون نافذ کرنیوالے اداروں نے انٹلیجنس کارروائی کے دوران انڈھڑ گینگ کی قید سے 9 مغوی بازیاب کرا لئے۔
ذرائع کے مطابق انڈھڑ گینگ کے مسلح افراد نے سی پیک پر سفر کرنیوالی مسافر گاڑی پر حملہ کر کے 11 افراد کو اغوا کرلیا تھا جبکہ 6 افراد کو فائرنگ کر کے زخمی کر دیا گیا تھا۔ بعد ازاں تین روز قبل 2 مغویوں کو رہا کر دیا گیا تھا جس کے بعد باقی مغویوں کی بازیابی کیلئے سرچ آپریشن جاری تھا۔
ذرائع کے مطابق گینگ کے سرغنہ تنویر انڈھڑ نے مغویوں کی رہائی کے بدلے اپنے بھائی منیرا انڈھڑ کی رہائی کا مطالبہ کیا تھا، تاہم سیکیورٹی اداروں نے دبائو میں آئے بغیر مربوط حکمت عملی اور مسلسل نگرانی کے بعد کامیاب کارروائی کر کے باقی 9 مغویوں کو بھی بحفاظت بازیاب کرا لیا۔
ڈی پی او رحیم یار خان عرفان علی سموں نے کامیاب آپریشن پر پولیس ٹیم کو سراہتے ہوئے کہا کہ عوام کی جان و مال کے تحفظ کو ہر صورت یقینی بنایا جائے گا اور جرائم پیشہ عناصر کے خلاف کارروائیاں بلا تعطل جاری رہیں گی۔
