اسلام آباد: وزیراعظم شہباز شریف نے ملک سے پولیو کے خاتمے کے عزم کا اعادہ کرتے ہوئے کہا ہے کہ پولیو خاتمے میں مشکلات ضرور مگر یہ ناممکن نہیں،اپنے عزم اور محنت سے بچوں کا مستقبل محفوظ بنائینگے۔
جاری بیان کے مطابق وزیراعظم شہباز شریف سے روٹری انٹرنیشنل فائونڈیشن کے صدر فرانسسکو اریزو کی سربراہی میں وفد نے ملاقات کی اس موقع پر وزیر صحت مصطفی کمال وزیر اعظم کی انسداد پولیو کیلئے خصوصی نمائندہ عائشہ رضا فاروق اور متعلقہ اعلی حکام بھی موجود تھے۔
وزیراعظم نے روٹری انٹرنیشنل سے پولیوجیسے موذی مرض کے پاکستان سے خاتمے کیلئے باقی بین الاقوامی اداروں کی طرح بھرپور تعاون پراظہار تشکر کیا۔وزیراعظم نے کہا کہ کہ ملک سے پولیو کے مکمل خاتمے کیلئے شعبہ صحت کی ٹیم، پولیو ورکرز اور تمام متعلقہ ادارے پر عزم ہیں۔
انہوں نے کہا کہ پولیو کے خاتمے کی راہ میں چیلنجز ضرور ہیں مگر یہ ناممکن نہیں، ہم اپنے عزم اور محنت سے بچوں کا مستقبل محفوظ بنائیں گے۔
وزیراعظم نے کہا کہ پولیو مہمات میں پولیو ورکرز کا کلیدی کردار قابل تحسین ہے۔وفد نے حکومت کے انسداد پولیو اقدامات کی تعریف کرتے ہوئے امید ظاہر کی کہ وزیر اعظم کی خصوصی توجہ اور قیادت کی بدولت پاکستان سے جلد اس موذی مرض کا خاتمہ ممکن ہو جائے گا۔
وفد نے روٹری انٹرنیشنل کے انسداد پولیو کیلئے حکومت کی معاونت جاری رکھنے کے عزم کا اعادہ کرتے ہوئے وزیراعظم کو بتایا کہ روٹری انٹرنیشنل نے گزشتہ برس میں 500ملین ڈالر انسداد پولیو کی مد میں پاکستان میں خرچ کئے اور رواں برس بھی اس مقصد کیلئے خطیر رقم خرچ کرنے کا خواہاں ہے۔
