اسلام آباد: وفاقی دارالحکومت اسلام آباد میں 5 سال کے دوران 567بچوں، بچیوں اور خواتین کو ریپ کا نشانہ بنایا گیا جبکہ وزیر مملکت داخلہ طلال چودھری نے کہا ہے کہ ملزمان کو سزا دینا پولیس نہیں، عدالت کا کام ہے، پولیس پراسیکیوشن و تحقیقات میں کام پورا کر رہی ہے، سزا بارے عدالت یا وکلاء سے پوچھا جائے۔
منگل کو سینیٹ اجلاس میں وزارت داخلہ کی جانب سے پیش کی گئی رپورٹ میں بتایا گیا کہ یکم جنوری 2021ء سے 20 جون 2025ء تک اسلام آباد میں ریپ کے 567 رجسٹر رپورٹ ہوئے، ان کیسز میں سے 485 میں چالان کیا گیا، 80کا جرم ثابت ہوا اور 23 ملزمان کو بری کیا گیا جبکہ 406 مقدمات ابھی چل رہے ہیں، 29 مقدمات پر انویسٹیگیشن چل رہی ہے جسے جلد مکمل کر لیا جائے گا۔
سینیٹ کو بتایا گیا کہ اسلام آباد میں 246بچوں اور228بچیوں کیساتھ ریپ کیا گیا، مقدمات میں 357 ملزمان کو گرفتار کیا گیا جبکہ 75 مفرور ہیں۔
سینیٹر شہادت اعوان نے کہا کہ سزا دینے کی شرح اتنی کم کیوں ہے، دیکھا جائے تو سزا کی شرح صرف4.2فیصد ہے، 95فیصد کو سزا نہیں ہوئی، اسلام آباد میں ریپ کنٹرول کرنے میں ناکام رہے ہیں صرف 24لوگوں کو سزا ہوئی۔
وزیر مملکت داخلہ طلال چودھری نے کہا کہ اسلام آباد میں انویسٹیگیشن اور پراسیکیوشن کی وجہ سے ریپ کیسز میں 15 فیصد کمی آئی، ریپ میں نامزد افراد گرفتار کئے جاتے ہیں مگر انہیں سزا دینا پولیس نہیں عدالت کا کام ہے، پولیس پراسیکیوشن اور تحقیقات میں اپنا کام پورا کر رہی ہے، سزا نہ ملنے بارے عدالت یا وکلاء سے پوچھا جائے ۔
