لاہور : حکومت پنجاب اور چینی سولر کمپنی کے درمیان سولر پینل کی تیاری، اسمبلی پلانٹ لگانے کا معاہدہ طے پا گیا جبکہ صوبائی وزیر تجارت چودھری شافع حسین نے کہا ہے کہ صنعتوں اور گھروں کو مہنگی بجلی سے بچانے کا واحد حل شمسی توانائی کا فروغ ہے۔
تفصیلات کے مطابق ایس آئی ایف سی کے تعاون سے حومت پنجاب اور چینی سولر کمپنی ’اے آئی کے او‘ کے درمیان سولر پینل کی تیاری اور اسمبلی پلانٹ لگانے کا معاہدہ طے پا گیا ہے۔معاہدے پر پنجاب حکومت کی جانب سے وزیر صنعت وتجارت چودھری شافع حسین اور چینی کمپنی ’اے آئی کے او‘ کی جانب سے صدر ساؤتھ پیسیفک ریجن ایلکس ہینگ نے دستخط کئے۔
اس موقع پر گفتگو کرتے ہوئے صوبائی وزیر شافع حسین نے کہا کہ چینی کمپنی پنجاب میں پہلی ’سولر پینلز‘ بنانے والی فیکٹری لگائے گی جو اپنی مصنوعات مقامی مارکیٹ میں فراہم کرنے کیساتھ اتھ برآمد بھی کرے گی۔ انہوں نے کہا کہ صنعتوں اور گھروں کو مہنگی بجلی سے بچانے کا واحد حل شمسی توانائی کا فروغ ہے، گزشتہ پانچ مہینوں میں سولر انرجی کے فروغ کیلئے 21 غیر ملکی کمپنیوں کے نمائندوں سے ملاقات کی گئی ہے۔
انہوں نے کہا کہ کئی کمپنیوں نے اس شعبے میں سرمایہ کاری میں دلچسپی ظاہر کی ہے جبکہ حکومت نے انہیں مکمل تعاون کی یقین دہانی کرائی ہے۔ انہوں نے کہا کہ پنجاب حکومت 7ہزار ٹیوب ویلوں کو شمسی توانائی پر چلانے اور کم آمدنی والے افراد کو مفت یا آسان اقساط پر سولر پینل فراہم کرنے کا منصوبہ بنا رہی ہے۔
