اسلام آباد: نیشنل کمپیوٹر ایمرجنسی رسپانس ٹیم نے اے ٹی ایم بندش و آن لائن بینکنگ بارے گمراہ کن خبروں کو مسترد کرتے ہوئے کہا ہے کہ عوام جھوٹی افواہوں پر کان نہ دھریں،اے ٹی ایم کی بندش،آن لائن بینکنگ بارے اب تک کوئی واقعہ پیش نہیں آیا، بینکنگ انفرا اسٹرکچر بشمول تمام اے ٹی ایم درست طریقے سے کام کررہے ہیں۔
تفصیلات کے مطابق اے ٹی ایم بندش و آن لائن بینکنگ بارے گمراہ کن معلومات پر نیشنل کمپیوٹر ایمرجنسی رسپانس ٹیم نے سٹیٹ بینک اور دیگر سٹیک ہولڈرز کی مشاورت سے ایڈوائزری جاری کرتے ہوئے کہا ہے کہ اے ٹی ایم کی بندش اور آن لائن بینکنگ سے متعلق اب تک کوئی واقعہ پیش نہیں آیا، بینکنگ انفرا اسٹرکچر بشمول تمام اے ٹی ایم درست طریقے سے کام کررہے ہیں، عوام جھوٹی افواہوں پر کان نہ دھریں اور جاری کردہ ہدایات پر عمل کریں۔
ایڈوائزری میں کہا گیا ہے کہ عوام اے ٹی ایم استعمال کرتے وقت اپنے اردگرد کے ماحول کا سختی سے مشاہدہ کریں، مالی معلومات، پن، پاس ورڈز، یوزر آئی ڈی اور او ٹی پیز کسی غیر متعلقہ شخص سے شیئر نہ کریں، کسی بھی مشکوک لنک پر کلک سے پرہیز کریں، مالی تحفظ کیلئے سرکاری ذرائع اور تصدیق شدہ معلومات پر بھروسہ کیا جائے۔
