اسلام آباد: ایشیائی ترقیاتی بینک نے رئیل سٹیٹ سیکٹر میں ٹیکس ریفارمز اور ٹیکس چھوٹ ختم کرنے کا مطالبہ کرتے ہوئے کہا ہے کہ مینوفیکچرنگ اور ایگری بزنسز میں سرمایہ کاری نہ ہونا گروتھ اور پیداوار میں رکاوٹ کا سبب ہے،بڑھتی آبادی کے باعث متبادل انرجی کے ذرائع کو وسعت دینا ہوگی، اربن ڈویلپمنٹ کیلئے سالڈ ویسٹ مینجمنٹ اور ٹرانسپورٹ سسٹم میں اصلاحات لانا ہوں گی۔
تفصیلات کے مطابق اے بی ڈی نے رئیل سٹیٹ سیکٹر میں ٹیکس ریفارمز لانے اور ٹیکس چھوٹ ختم کرنے کا مطالبہ کرتے ہوئے کہا ہے کہ اوپن پلاٹس پر 6 سال بعد ٹیکس استثنیٰ ختم اور پراپرٹی ڈویلپمنٹ پر ٹیکس عائد ہونا چاہئے، پراپرٹی ڈویلپمنٹ پر ٹیکس استثنیٰ ہونے کے باعث مینوفیکچرنگ اور ایگری بزنسز میں سرمایہ کم ہو رہی ہے، مینوفیکچرنگ اور ایگری بزنسز میں سرمایہ کاری نہ ہونا گروتھ اور پیداوار میں رکاوٹ کا سبب ہے۔
بیان میں کہا گیا ہے کہ غیرمنقولہ پراپرٹی کی فروخت و سرمایہ کاری پر سٹینڈرڈ ٹیکس عائد کیا جانا چاہئے، پراپرٹی ڈویلپمنٹ پر ٹیکس مراعات دے کر حکومت کو ریونیو سے محروم رکھا گیا، ٹیکس استثنیٰ کے باعث لوکل سرمایہ کاری رئیل سٹیٹ سیکٹر میں کی گئی۔
اے بی ڈی نے پاکستان نیشنل اربن اسیسمنٹ رپورٹ میں انرجی ریفارمز، واٹر سپلائی ریفارمز کیلئے اقدامات کا مطالبہ کرتے ہوئے کہا ہے کہ واٹر سپلائی، ٹرانسپورٹ سسٹم، بلڈنگ ڈیزائن میں توانائی کے بہتر استعمال کیلئے اقدامات ناگزیر ہیں۔
رپورٹ میں کہا گیا کہ پاکستان میں بڑھتی آبادی کے باعث متبادل انرجی کے ذرائع کو وسعت دینا ہوگی، واٹر ریسورسز مینجمنٹ پلان سے پینے کیلئے صاف پانی کی فراہمی اور پانی ضائع کرنے پر پیلنٹی ہوگی۔ اے بی ڈی نے اربن ڈویلپمنٹ کیلئے سالڈ ویسٹ مینجمنٹ اور ٹرانسپورٹ سسٹم میں اصلاحات لانے کا مطالبہ کیا ہے۔
