لاہور: وزیراعلی پنجاب مریم نواز نے کہا ہے کہ ملکی ترقی میں بیرون ملک مقیم پاکستانیوں کا کردار ناقابل فراموش ہے، مسائل کے حل کیلئے اقدامات اٹھا رہے ہیں۔
ہفتے کو مریم نواز سے رکن قومی اسمبلی نصیر احمد عباس نے ملاقات کی جس میں باہمی دلچسپی کے امور اور ترقیاتی منصوبوں میں پیشرفت پرتبادلہ خیال کیا گیا۔ اس موقع پر اوورسیز پاکستانیوں کے مسائل کے حل سے متعلق امور پر بھی گفتگو کی گئی، ملاقات میں (ن) لیگ جاپان کے صدر ملک نور اعوان بھی شریک تھے۔
وزیر اعلی نے کہا ہے کہ مسلم لیگ (ن) عوامی خدمت کی سیاست پر یقین رکھتی ہے، ہر علاقے کی ترقی اور عوامی فلاح کیلئے تمام وسائل بروئے کار لائے جا رہے ہیں، مثالی گائوں پراجیکٹ کے تحت دیہات میں معیاری سہولتیں فراہم کر رہے ہیں۔ انہوں نے بتایا کہ پنجاب کی 12 ہزار کلومیٹر سڑکوں کی تعمیر و بحالی ہو چکی ہے، فیلڈ ہسپتال اور کلینک آن وہیلز سے ایک کروڑ سے زائد مریض مستفید ہو چکے ہیں۔
انہوں نے کہا کہ ملکی ترقی میں اوورسیز پاکستانیوں کا کردار ناقابل فراموش ہے، حکومت بیرون ملک مقیم پاکستانیوں کے مسائل کے حل کیلئے اقدامات اٹھا رہی ہے۔
