کراچی: وزیر اطلاعات سندھ شرجیل میمن نے کسی بڑے نقصان سے بچنے کیلئے شہریوں کو خطرناک عمارتیں فوری خالی کرنے ہدایت کرتے ہوئے کہا ہے کہ عوام کی سلامتی اولین ترجیح ہے، مون سون کے دوران کسی قسم کی کوتاہی برداشت نہیں کی جائے گی۔
صحافیوں سے گفتگو کرتے ہوئے شرجیل میمن نے بتایا کہ مون سون بارشوں کے دوران عوام کے جان و مال کے تحفظ کیلئے تیاریاں مکمل کر لی ہیں، بلدیاتی اداروں کے عملے کی چھٹیاں منسوخ کردی گئی ہیں۔
انہوں نے کہا کہ ڈپٹی کمشنرز اور بلدیاتی اداروں کے چیئرمینوں کو ہدایت دی گئی ہے کہ بارش کا پانی فوری طور پر نکالنے کے انتظامات کئے جائیں۔ انہوں نے بتایا کہ نشیبی علاقوں میں ڈی واٹرنگ پمپس کی دستیابی ہر صورت یقینی بنانے کیلئے اقدامات مکمل ہیں۔
انہوں نے کہا کہ کراچی کے اولڈ سٹی ایریا میں 59 خطرناک عمارتوں کی نشاندہی کی گئی ہے، 10 عمارتیں قومی ورثہ قرار دی گئی ہیں، سٹرکچرل انجینئرز پر مشتمل سندھ بلڈنگ کنٹرول اتھارٹی کی تکنیکی کمیٹی شہر بھر میں مسلسل سروے کر رہی ہے جس کا مقصد ایسی عمارتوں کا پتا لگانا ہے جو شہریوں کیلئے خطرہ بن سکتی ہیں۔
انہوں نے بتایا کہ انسانی جانوں کا تحفظ یقینی بنانے کے لئے اب تک 41 انتہائی خطرناک عمارتوں کو خالی کرا کے سیل کر دیا گیا ہے۔ متوقع بارشوں کے پیش نظر ایس بی سی اے میں ایک رین ایمرجنسی سینٹر قائم کر دیا گیا ہے جو 24 گھنٹے فعال ہے۔
انہوں نے کہا کہ عوام کی سلامتی حکومت سندھ کی اولین ترجیح ہے، مون سون کے دوران کسی قسم کی کوتاہی برداشت نہیں کی جائیگی، شہری خطرناک عمارتیں فوری طور خالی کریں اور حکام کے ساتھ تعاون کریں تاکہ کسی بڑے نقصان سے بچا جا سکے۔
