سربراہ اے ایم ایل شیخ رشید نے کہا کہ (ن)لیگ،پیپلزپارٹی کے نئی صورتحال سے گزرنے پر پاکستانی سیاست میں رنگینی آئے گی،کسی سے رابطہ نہیں، چاہتا ہوں مذاکرات ہوں،ملکی مسائل و مشکلات کا حل نکلے چاہے کسی تنگ گلی سے ہی نکلے، ملکی سیاست میں 30دسمبر تک اچھی خبریں آئیں گی۔اے ٹی سی کے باہر میڈیا سے گفتگو کرتے ہوئے سربراہ اے ایم ایل شیخ رشید نے کہا کہ آج عدالت میں دونوں طرف سے گرما گرم بحث ہوئی ہے، چالان کی نقول تقسیم ہوئیں لیکن ہمیں نہیں دی گئی، یہ کیسز بہت لمبے جائیں گے،11کیسز صف میرے خلاف ہیں، سردار رازق میری طرف سے لڑرہے ہیں،
9 مئی فیصلے آسانی سے ہونیوالے نہیں بڑا وقت لیں گے۔انہوں نے کہا کہ پہلے بھی اپیل کرچکا ہوں بے گناہ لوگوں کو رہا کیا جائے، 102ملزمان ایسے ہیں جنہوں نے ابھی تک وکیل ہی نہیں کیا، آئی ایل ایف اور دوسرے لوگ ان کے وکالت نامے داخل کریں،
جنرل عاصم منیر سے درخواست ہے غریب کے بچوں کے حالات ان کو پتہ نہیں،ان کے گھر کا چولہا بھی نہیں جل رہا۔ انہوں نے کہا کہ ملک نازک صورتحال سے گزر رہا ہے،ملک میں آئین، قانون و انصاف نہیں ہے، جنہوں نے ملک کو معاشی طور پر تباہ کیا، ان کے بیٹے باہر لندن میں بھی ٹیکس ڈیفالٹ ہوئے، انہوں نے باہر بھی ملک کی بدنامی کی۔ انہوں نے کہا کہ ہم نے 60تعلیمی ادارے بنائے،آج بچوں کے پاس داخلے کی فیس بھی نہیں،
لال حویلی میں رابطہ کریں راولپنڈی کی ساری بچیوں کی فیس ہم دیں گے۔ ایک سوال پر انہوں نے کہا کہ (ن)لیگ اور پیپلزپارٹی کے نئی صورتحال سے گزرنے پر پاکستانی سیاست میں رنگینی آئے گی، ملکی سیاست میں 30دسمبر تک اچھی خبریں آئیں گی۔
انہوں نے کہا کہ خدا کو گواہ بنا کر کہتا ہوں کسی سے کوئی رابطہ نہیں، چاہتا ہوں مذاکرات ہوں اور ملکی مسائل و مشکلات کا حل نکلے چاہے کسی تنگ گلی سے ہی نکلے اور بانی پی ٹی آئی سمیت تمام لوگوں کورہائی ملے۔ انہوں نے کہا کہ کیپٹن صفدر اس قابل نہیں کہ اس کی کسی بات کا جواب دوں۔
