اسلام آباد: وزیر اطلاعات عطا اللہ تارڑ نے کہا کہ آئینی ترامیم پر وسیع مشاورت جاری ہے، مسودے میں نظام انصاف آسان بنانے کی شقیں موجود ہیں، امریکہ میں کیپٹل ہل کیسز چند ماہ میں انجام کو پہنچے، یہاں 9 مئی واقعات کے فیصلے اب تک نہیں ہوسکے، پی ٹی آئی نے معاملے پر سیاست کی، کسی کو این آر او نہیں ملے گا۔
تفصیلات کے مطابق اسلام آباد میں پریس کانفرنس کرتے ہوئے وفاقی وزیر اطلاعات عطاء تارڑ نے کہا کہ آئینی ترامیم کے حوالے سے وسیع تر مشاورت کا جاری ہے، تمام سیاسی جماعتوں نے نہ صرف اس پر گفتگو بلکہ اتفاق رائے پیدا کرنے کی کوشش کی۔
انہوں نے کہا کہ وزیر قانون کا آئینی ترامیم کے مسودے کے حوالے سے کردار لائق تحسین ہے۔انہوں نے کہا کہ مولانا فضل الرحمن سے بھی آئینی ترامیم پر مشاورت جاری ہے، آئینی ترمیم پر اتفاق رائے پیدا کیا جا رہا ہے، مسودے میں انصاف کے نظام کو آسان بنانے کیلئے شقیں موجود ہیں،مزید مشاورت کر کے معاملے کو آگے بڑھنا چاہئے۔
انہوں نے کہا کہ پی ٹی آئی نے آئینی ترمیم کے مسودے پر سیاست کی، کسی کو این آر او نہیں ملے گا۔انہوں نے کہا کہ دنیا کے مختلف ممالک میں سپریم کورٹ الگ اور آئینی عدالتیں الگ ہوتی ہیں، آئینی معاملات آئینی عدالتوں میں جاتے ہیں تاکہ عام شہریوں کو انصاف کی راہ میں رکاوٹ نہ آئے اور کیسز جلد منطقی انجام تک پہنچ سکیں۔
انہوں نے کہا کہ پاکستان میں 9 مئی واقعات کے فیصلے اب تک نہیں ہوسکے جبکہ امریکا میں کیپٹل ہل کے کیسز چند ماہ میں اپنے انجام کو پہنچے۔
