راولپنڈی: بانی پی ٹی آئی عمران خان نے لاہورجلسہ ہر صورت کرنے کا اعلان کرتے ہوئے کہا ہے کہ قوم کو پیغام ہے کشتیاں جلا کر نکلیں،آئینی ترمیم فراڈ الیکشن کو تحفظ، تین امپائرز کو توسیع دینے کیلئے ہورہی ہے، انہیں ڈر ہے قاضی فائز عیسیٰ راستے سے ہٹ گیا تو 9مئی اور فراڈ الیکشن کی تحقیقات کھل جائیں گی،جمہوریت کی مضبوطی کیلئے تمام فورسز کو اکھٹا ہونا ہوگا، آئینی ترمیم بارے مولانا فضل الرحمن کے کردار بارے کچھ نہیں کہہ سکتا، اگر وہ ساتھ کھڑے ہیں تو اچھی بات ہے۔
تفصیلات کے مطابق اڈیالہ جیل میں میڈیا سے غیر رسمی گفتگو کرتے ہوئے بانی پی ٹی آئی عمران خان نے کہا کہ یہ آئینی ترمیم اس لئے کررہے ہیں کیونکہ انہوں نے چار امپائرز کو ساتھ ملا کر کھیلا مگر پھر بھی ہار گئے، اب آئینی ترمیم تین امپائروں کو توسیع دینے کیلئے کرنی پڑ رہی ہے۔
انہوں نے کہا کہ ان امپائرز میں چیف جسٹس قاضی فائز عیسیٰ، چیف جسٹس اسلام آباد ہائیکورٹ اور چیف الیکشن کمشنر شامل ہیں،توسیع فراد الیکشن کو تحفظ دینے کیلئے دی جارہی ہے۔ انہوں نے کہا کہ انہیں ڈر لگا ہوا ہے کہ قاضی فائز عیسیٰ راستے سے ہٹ گیا تو 9مئی اور فراڈ الیکشن کی تحقیقات کھل جائیں گی، 9مئی کو ہماری پارٹی ختم کرنے کی کوشش کی گئی، آئین کے برخلاف پی ٹی آئی کو کرکرش نے کیلئے الیکشن تاخیر کا شکار کیا گیا۔
انہوں نے کہا کہ مجھ پر 140 کیس 9مئی سے پہلے ہو چکے تھے، مجھ پر دو قاتلانہ حملے بھی ہو چکے تھے پارٹی ختم نہیں ہو رہی تھی اسی لئے 9مئی کیا گیا۔ انہوں نے کہا کہ قاضی فائز عیسیٰ ایک سال سے 9مئی کی جوڈیشل انکوائری نہیں ہونے دے رہے، انہیں ڈر ہے نیا چیف جسٹس آیا تو 9مئی کی تحقیقات کرائے گا، 9مئی جس نے کروایا وہی اس کا اصل ذمہ دار ہے۔
انہوں نے کہا کہ لاہور سے نکلتے ہوئے کہا تھا کہ وارنٹ دکھائیں اور گرفتار کرلیں مگر مجھے گرفتار کرکے گھسیٹ کر لے جانے کا مقصد لوگوں کو اشتعال دلانا تھا جس کے بعد ہر جگہ کی سی سی ٹی وی فوٹیج غائب کردی گئیں، اسلام آباد ہائیکورٹ سے اغواء کی فوٹیج بھی چوری ہوگئی، نئے چیف جسٹس کے سامنے جب 9مئی کی پٹیشن لگے گی تو اصلیت سامنے آجائے گی۔
انہوں نے کہا کہ پی ٹی آئی کو کرش کرنے کے بعد 8فروری کا الیکشن کروایا گیامگراس دن جو انقلاب آیا وہ ان کے وہم و گمان میں بھی نہیں تھا، 8فروری کو پی ٹی آئی بغیر لڑے جیت گئی، نواز شریف نے تو فتح کی تقریر تیار کر رکھی تھی، یاسمین راشد جیل میں ہوتے ہوئے بھی جیت چکی تھی، نواز شریف کو 74 ہزار ووٹ ڈلوائے گئے، 8ماہ گزر چکے ہیں الیکشن ٹریبونل کیوں کام نہیں کر رہے۔
ایک سوال کے جواب میں انہوں نے کہا کہ آئینی ترامیم کی حمایت کے معاملے میں مولانا فضل الرحمن کا کیا کردار ہوگا کچھ نہیں کہہ سکتا۔ انہوں نے کہا کہ ملک میں جمہوریت کو مضبوط دیکھنے والی تمام فورسز کو اکھٹا ہونا ہوگا، اگر مولانا فضل الرحمن بھی ساتھ کھڑے ہیں تو اچھی بات ہے۔
ایک اور سوال پر انہوں نے کہا کہ تین چیف جسٹسز نے حمود الرحمن کمیشن رپورٹ بنائی تھی، وہ رپورٹ کہتی ہے کہ یحییٰ خان نے اپنی طاقت کو بچانے کیلئے جمہوریت کا جنازہ نکالا، اپنی طاقت بچانے کیلئے ملک کو آج دوبارہ اس نہج پر لایا جا رہا ہے، قانون کی بالادستی کو ختم کیا جا رہا ہے، قانون کی بالادستی کے بغیر سرمایہ کاری نہیں آسکتی یہ آپس میں جڑے ہوئے ہیں۔
انہوں نے کہا کہ سیاسی استحکام کے بغیر معیشت مستحکم نہیں ہوسکتی آج صورتحال یہ ہے کہ پاکستان کا موازنہ میانمار سے ہو رہا ہے، چار ہزار پاکستانی کمپنیوں نے دبئی چیمبر میں رجسٹریشن کروائی ہے پیسہ ملک سے باہر جا رہا ہے۔
انہوں نے کہا کہ بیرون ملک مقیم پاکستانی اثاثہ ہیں قرضوں کی دلدل سے نکالنے کیلئے ان کی سرمایہ کاری اہم ہے، چائنہ کی ترقی میں بیرون ملک مقیم چینیوں نے سرمایہ کاری کی تھی۔ انہوں نے کہا کہ بیرون ملک مقیم پاکستانی قانون کی بالادستی نہ ہونے کی وجہ سے سرمایہ کاری نہیں کر رہے، دوسرا نواز شریف زرداری اور محسن نقوی سمیت تمام بڑوں کے پیسے بیرون ملک پڑے ہیں۔
انہوں نے کہا کہ فراڈ حکومت کی وجہ سے بھی بیرون ملک مقیم پاکستانی سرمایہ کاری نہیں کر رہے، ملک کو اصلاحات کی ضرورت ہے پاکستان اس کے بغیر دلدل سے نہیں نکل سکتا، اصلاحات کے ذریعے خرچ کم،آمدنی بڑھانا ہوتی ہے، 8ماہ ہونے کو ہیں حکومت نے کتنی ریفارمز کیں اور کتنے اخراجات کم کئے؟ یہ حکومت این ار او کی پیداوار ہے حکومت سے نہ خرچ کم ہونے ہیں نہ سرمایہ کاری بڑھنی ہے، یہ لوگ بڑے لوگوں پر بوجھ ڈال نہیں سکتے کیونکہ وہاں مافیا بیٹھے ہیں، صرف سپریم کورٹ سے لوگوں کو امیدیں ہیں لیکن اب اسے بھی تباہ کیا جا رہا ہے ماتحت عدلیہ اور پولیس پر کسی کو اعتماد نہیں رہا۔
انہوں نے کہا کہ لاہور میں پی ٹی آئی جلسہ روکنے کیلئے پکڑ دھکڑ شروع کر دی گئی ہے، جو بھی ہو جائے لاہور کا جلسہ کریں گے، قوم کو پیغام ہے لاہور کے جلسے کیلئے کشتیاں جلا کر نکلیں۔
