لاہور: وزیر اعلیٰ مریم نواز شریف نے کہا ہے کہ ماحول صاف رکھنا اجتماعی معاشرتی ذمہ داری ہے،ستھرا پنجاب پروگرام کے تحت ماحول دوست پائیدار اقدامات کئے جا رہے ہیں، کوڑا کرکٹ ٹھکانے لگانے کے مناسب طریقے اپنائے، پلاسٹک کا استعمال نہ کیا جائے۔نجی ٹی وی کے مطابق ”انٹرنیشنل کلین اپ ڈے“ کے حوالے سے اپنے پیغام میں وزیراعلی پنجاب مریم نواز نے کہاکہ کرہ ارض کو صاف ستھرا رکھنا،ماحول کی حفاظت اور بقاء کیلئے ناگزیر ہے۔
انہوں نے کہا کہ اپنے ماحول کو صاف رکھنا اجتماعی معاشرتی ذمہ داری ہے،عوام کوڑا کرکٹ ٹھکانے لگانے کے مناسب طریقے اپنائیں اور پلاسٹک کا استعمال نہ کریں۔
انہوں نے کہا کہ ستھرا پنجاب پروگرام کے تحت ماحول دوست پائیدار اقدامات کئے جا رہے ہیں، تاریخ میں پہلی بار رورل ایریاز میں بھی صفائی، کچرے کی ری سائیکلنگ، شجرکاری اور پبلک مقامات کی صفائی کا اہتمام کیا جا رہا ہے۔
انہوں نے کہا کہ پنجاب حکومت صفائی کرا رہی ہے، شہری بھی ذمہ داری نبھاتے ہوئے اپنے شہروں، دیہات،گلی محلوں کو صاف ستھرا رکھیں اور ماحول کے تحفظ کیلئے کردار ادا کریں۔ انہوں نے کہا کہ یاد رکھیں، صاف پاکستان ہی ایک صحتمند اور ترقی یافتہ پاکستان ہے۔
