پاکستان کرکٹ بورڈ نے قومی کرکٹ ٹیم کی سلیکشن کمیٹی سے کپتان، کوچ اور نان ووٹنگ ممبرز کو نکالتے ہوئے سلیکشن میں کپتان اور ہیڈ کوچ کے اختیار کو ختم کردیا ،سلیکشن کمیٹی کی تعداد 7 سے کم کرکے صرف 5 ارکان تک محدود کردی گئی۔ پی سی بی نے 5 سلیکٹرز عاقب جاوید، علیم ڈار، اظہر علی، اسد شفیق اور حسن چیمہ کو ہی مکمل طور پر با اختیار بناتے ہوئے پلینگ الیون منتخب کرنے کا حق بھی سونپ دیا ، کپتان اور ہیڈ کوچ کو 15 رکنی ٹیم کیساتھ پلینگ الیون منتخب کرنے کے حوالے سے ووٹنگ رائٹس سے بھی محروم کر دیا۔ 15 رکنی ٹیم میں کس کو شامل ہونا چاہیے، اس کا فیصلہ اب یہ پانچوں سلیکٹرز ہی کریں گے۔ کس میچ میں کون سی پلینگ الیون کھیلے گی، یہ فیصلہ بھی اب یہ پانچ سلیکٹرز ہی کریں گے تاہم پندرہ رکنی ٹیموں کے ساتھ 11 ارکان کے انتخاب کے وقت عاقب جاوید، اظہر علی، علیم ڈار، اسد شفیق اور حسن چیمہ ٹیم کپتان اور ہیڈکوچ کے ساتھ مشاورت کے ضرور پابند ہوں گے۔ سلیکٹرز ٹیم انتظامیہ کی رائے ضرور لیں گے تاہم فیصلہ سازی کا مکمل اختیار ان کا اپنا ہوگا۔
