بھارتی میڈیا نے کہا ہے کہ 9 سال میں کسی بھی بھارتی وزیر خارجہ کا پہلا دورہ پاکستان بغیر کسی مسئلہ کے مکمل ہونا بھارتی حکومت نے مثبت پیشرفت تصور کیا ہے۔بھارتی میڈیا کے مطابق وزیر خارجہ جے شنکر کے دورہ اسلام آباد میں دوطرفہ بات چیت نہیں ہوئی مگر پاکستان اور بھارت کے درمیان تعلقات بحالی کی جانب بڑھ رہے ہیں، پاک بھارت وزرائے اعظم کا اگلے ماہ کوپ29 اجلاس کے موقع پر آمنے سامنے آنے کا امکان ہے تاہم کسی بنیادی پیشرفت کے لیے بھارت چاہے گا کہ نئی دہلی میں پاکستانی ہائی کمشنر کا پھر سے تقرر کیا جائے۔بھارتی میڈیا کے مطابق جے شنکر کی وزیراعظم شہباز شریف اور وزیر خارجہ اسحق ڈار سے باضابطہ دو طرفہ ملاقات نہیں ہوئی، ابتدائی طور پر ایسا طے نہیں کیا گیا تھا مگر شنگھائی تعاون تنظیم اجلاس کے دوران ظہرانے کے موقع پر دونوں وزرا خارجہ ساتھ ساتھ بیٹھے اور دیگر مندوبین کی موجودگی میں طویل بات چیت ہوئی۔
